Highlander an tlawm

NorthEast United chu tun season ISL-a a vawi khat nan an tlawm ve ta a, Jamshedpur FC chuan 1-0 in an hneh - inkhela goal awmchhun hi Aniket Jadhav-a'n minute 53-naa a khung a ni a, Jackichand Singh siamsak a ni. 

Highlander-in penalty hmangin si phurh sutna remchang an nei a, mahse, Queens Park Rangers striker hlui Idrissa Sylla chuan an hun ṭha neih hi goal-ah a chantir thei lo - NorthEast United tan hian Lalengmawia leh Rochharzela ten inkhel bul an ṭan a, danglamna erawh an thlen thei bik lo. 

Jamshedpur tan Laldinliana Renthlei leh Ricky Lallawmawma te chuan inkhel bul an ṭan a, midfield-ah Isaac Vanmalsawma chuan bul a ṭan bawk. Inrinni zan inkhelah Chennaiyin FC chuan 2-1 in FC Goa an hneh bawk a, minute ngana leka Chennai club tana Rafael Crivellaro goal hmahruai chu Goa hian Jorge Ortiz Mendoza hmangin chhanglet mah se Rahim Ali chuan second half-ah Chennai club tan chakna goal a khung. 

Lallianzuala Chhangte chuan tun season-a a goal hmasa ber khung turin hun ṭha nei mah se goal-ah a chantir thei lo a, Jerry Lalrinzuala-a shot per aṭanga a hun ṭha neih vawi hnihna pawh a khawhral - Lunglei tlangvalin Jakub Sylvestr tana a siamsak chu Jakub hian goal-ah a chantir thei lo bawk. 

Inkhel Result

NorthEast United    0 - 1    Jamshedpur FC

JFC: Aniket Jadhav 53'

FC Goa    1 - 2    Chennaiyin FC

FCG: Jorge Ortiz Mendoza 9'

CFC: Rafael Crivellaro 5'; Rahim Ali 53'

Zanin Inkhel Tur

ATK Mohun Bagan    7:30 PM    Bengaluru FC