Mumang rama leng Antonio

England manager Sam Allardyce-a'n Slovakia hmachhawn tur squad a puan zingah ram tana la inlan lo West Ham winger Michail Antonio a tel a, kum 26-a upa winger chuan England tan koh a nih thu hrilh a nih hian a ṭhianten an fiam emaw a tih thu a sawi!

Non-league club-a a career ṭantu winger chuan, "Jamaica tan khel tura koh ka ni tawh a, mah se England tana la khelh phak ve ka beiseina avangin ka hnar a ni. Engtikah emaw chuan he hmun hi ka thlen ka inbeisei tlat a, ka tum ram thleng turin ka thawkrimin ka bei nasa em em a ni," a ti.

Season hman zawh taka West Ham tana vawi 31 inlana goal kua khungtu winger chuan a nunhlui thlirkirin, "Non-league club aṭanga Premier League inhlankai hi thawnthu danglam tak a ni a, zantin darkar khat College-ah lifeguard hna ka thawk ṭhin a, mi tui cheng lai en rikngawt chu a ninawm thei em em a ni," tiin a nunhlui leh tun dinhmun chu thil inthlau tak a nih thu a sawi lang.