Olympic gold medal beiseitu Sindhu

India hmeichhe zinga mimala Olympic silver medal la thei hmasa ber Pusarla Venkata Sindhu chuan Tokyo 2020 Olympic-ah ram tan gold medal dawn ngei a duh thu a sawi.

Rio Olympic-ah khan India hian badmintion inelnaah shuttler 7 an tir a, hmeichhe singles-ah Sindhu hian final lutin world number 1 Carolina Marin hneh lo mah se India tan silver medal a dawng a, hnuhma ropui leh hriatreng tawh tur a hnutchhiah.

The Times of India-in an kawmnaah Sindhu chuan, "Silver medal a tawp mai hi ka tum lo a, engtiklai pawhin pakhatna nih duh mi ka ni. Champion nih hi thil awlsam a nih loh zia ka hria a, thawhrim a ngaih bakah vanneih tel a ngai bawk. Tokyo-ah chuan ka theih tawp ka chhuah leh ang a, tun aia sang zawk thlen ka tum ang," tiin a sawi.

Sindhu chuan zawhna chhang-in, "Final inkhel kha kan enlet a nih chuan tihsual ka ngah a, ka khingpui a khelh ṭhat bakah tihfuh loh ka ngah lutuk kha a chak loh chhan a ni. Chutihrualin Marin pawh ka lawm pui - a chhan chu ani hi player thawkrim tak a ni a, hlawhtlinna chan a phu," a ti.

Rio-ah khan London Olympic bronze medalist Saina Nehwal-in beisei a phak lo a, knock out round a lut zo lo. Sindhu hi tunah chuan Saina aia India beisei sanna nia sawitu an tam ta hle.

Sindhu chuan, "World num-ber 1 leh India number 1 chu a tehtu thinlung a zir a ni ang. Kei chuan bul ka ṭan ve chauh a ni a, kawng zawh tur a la thui em avangin hma hun sawi lawk a harsa," a ti.

Hyderabad nula hi tunah kum 21 a upa chauh a la ni a, world number 10 ni mekin India beiseina a ni. Tokyo Olympic-ah chuan kum 25 a lo ni tawh dawn a, harsatna lian tham a tawk a nih lem loh chuan a vanglai tak ni tura ngaih a ni.