Dutt-a bronze dawn kha silver zawk!

London Olympic-ah khan Indian wrestler Yogeshwar Dutt chuan 60-kg freestyle category-ah bronze medal a dawng a, mah se tun hnaia World Anti-Doping Agen-cy (WADA) in London Olympic-a inlan infiammiten damdawi hman phal loh an hman leh hman loh an enfiah nawn naah silver medalist Russian wrestler Besik Kudukhov chu a fihlim lo tih hmu chhuakin Yogeshwar hnenah silver medal hi hlan a ni dawn.

Haryana tlangval hian 2012 London Olympic-ah khan pre-quarterfinal-ah Russian wrestler Besik Kudukhov hi hneh lo mah se repechage round hmanga hun ṭha nei lehin pathumna inchuhnaah Puerto Rico wrestler Franklin Gomez hnehin bronze medal a dawng leh a ni. Wrestling Federation of India (WFI)-in United World Wrestling aṭanga pawmpuina a hmuh hunah Yogeshwar hi silver medal hlan a ni ang.

Yogeshwar chuan, "Besik Kudukhov hi infiammi ṭha tak a ni a, wrestler ka nih avangin ka zah hle, a thih hnua hetiang chanchin a nei hi pawi ka tiin a medal lo dawn tawh hi chu a chhungten kawl reng se ka duh a ni," tiin a sawi a, hemi hnu lawk hian a medal dawn chu India tan a hlan thu a sawilang nghal bawk. Russian wrestler Kudu-khov hi kum 2013 khan Russia ram chhim lama car chesualah a thi a ni.

India tan Sushil Kumar chuan London-ah khan 66 kg freestyle-ah silver medal a lo dawng tawh bawk a, hetiang thu a awm leh takah chuan India hian 2012 khan wrestling-ah silver pahnih a dawng tihna a ni ang.