Zanin dar 7 atangin MPL5 Zo United khingpui tur Bethlehem VT
Mizoram chhunga football inelna sang ber Mizoram Premier League Season 5 chu zanin 7:00 hian Lammualah khelh
ṭan a ni dawn. Team pariatin semifinal luh inchuhin league match vawi 14 chauh an khelh dawn avangin vawi khat chak pawh a pawimawh khawp ang.
MPL5 khuh hawnnaah hian Zo United FC leh Bethlehem Vengthlang FC te an inhmachhawn dawn a, club pahnih hi MPL4 semifinalist an ni.
Kumin I Day Football-ah Zo United leh BVT hi Lammualah an intawng tawh a, 2-2 in an ṭin. MPL5-ah bik chuan an intawn tawhna ni loin zanina an inkhel hian an hmalam hun a hril ang.
Match hmasa ber
Zo United coach Vanlalrova tan MPL season khata match hmasa ber khelh hi thil thar a ni lo. MPL ṭan kum khan a team enkawl Luangmual FC chuan Chanmari FC hmachhawnin 1-1 in an inhnehtawk. MPL history-a goal hmasa ber khungtu chu Lalbiaktluanga niin Electric Veng tlangval hi MPL-ah a inziaklut tawh lo.
MPL2-ah Luangmual FC bawkin season bul an ṭan a, Aizawl FC 2-1 in an hneh. Luangmual enkawltu hi tun ṭuma Aizawl FC coach K. Malsawmkima hi a ni a, man of the match-a thlan Luangmual midfielder Lalruatdika hi Mala puiin AFC-ah assistant coach hna a chelh tawh bawk.
Aizawl West Derby-in MPL3 ṭan a ni a, team ṭha zawka ngaih Dinthar FC chu Chanmari West FC lakah 1-2 in an tlawm. Season liam taah erawh West Warrior hi Aizawl FC lakah 0-1 in an chak lo thung.
MPL hmasa ber tih lohah chuan season
ṭanna match hmasa berah chak zawk an awm vek a, chak chiang erawh an awm lo. MPL4-ah Aizawl FC-in an vanglai an hmang chung pawhin harsa takin H. Lalmuankima goal hmangin Chanmari West an hneh hram.
MPL-ah coach thar
Bethlehem Vengthlang FC-in MFA Super Cup-a champion puitu coach Lalsangzuala Hmar thlak nan veng inelnaa coach leh player anga Armed Veng tihming-
ṭhatu Lalbiaksanga Colney an lalut.
Club inelnaa tawnhriat nei tam lo BS-a'n MPL harsatzia a hriat hmain I Day Football leh MFA Super Cup a hmachhawn hman hlauh. I Day Football-ah BVT-in chak hmel an hmu lo a, MFA Super Cup-ah erawh Tuidam 6-1 zetin an sawp a, Aizawl FC hneh loin semifinal thleng zo lo mah se champion zui ta laka an tlawmna hi penalty shootout a ni.
I Day Football-ah BVT player-te fitness a ṭha tawk lo a, MFA Super Cup-ah hma an sawn tih a lang a, MPL-ah an ṭha lehzual ang.
Hei bakah hian an squad tihchak nan winger Lalrammawia an lalut a, ITI Veng tlangval hi Aizawl FC ann tum ṭumin practice miah loin midfield laiah hman a ni. Ke vei lam hmang thiam Rammawia hi Zo United an khelh hunah chuan a tlangnel tawh dawn a, player hmuhnawm a nih tawh ngei beisei a ni.
Hriatthiam har Zo United
I Day Football-ah Zo United-in Shillong Lajong chiah hneh lo mah se group stage an patlang zo lo. Zanina an hmachhawn tur BVT bakah Ramhlun North an draw a, Dinthar FC chiah an hneh.
MFA Super Cup-ah first division club zinga team ṭha pawl ni pha tura ngaih 1st Bn MAP Academy chu 3-0 in an sawp a, defender pawimawh Malsawma Chhangte hnawhchhuah a nih avangin quarterfinal-ah an chhawr thei lo. Chanmari FC lakah 2-3 in an chak lo.
Zo United ṭhatna ber hi an tlar hnungah a ngaih theih a, amaherawhchu BVT an hmachhawn hmasak ṭumin goal hnih an chhuah. Hei chauh hi a ni lo, Shillong Lajong laka goal an khung hmasak hnuah goal hnih an chhuah. I Day Football-ah Chanmari FC lakah goal thum an chhuah - minute 90 chhunga an fimkhur thei lo hi an team chak lohna a ni - an midfield ball inpe kual erawh a hmuhnawm.
Chak inring ve ve
BVT coach BS-a chuan, "Zo United nen I Day Football-ah khan kan inhnehtawk ringawt a, tun ṭumah erawh kan chak ang," tiin Vanglaini palai a hrilh.
BVT inrintawkna hi a tak chang turin veng chhung mipui an pawimawh dawn, season liam taa semifinal an thlen ṭumin MPL-ah BVT aia ṭantu nei ṭha an awm chuang lo. Tun season-ah erawh result ṭha an neih loh avangin Lammualah BVT ṭantute an la hawi sang lo a, amaherawhchu result ṭha nei tur chuan MFA Super Cup pawh lo champion tawh BVT
ṭantuten an player-te an rin ngam a ṭul a ni.
BVT boss inhrosakna vangin Zo United coach Vanlalrova a talbuai lo a, Luangmual coach hlui chuan, "Kan ṭha zawk a, kan chak pawh ka ring. BVT laka point thum hmu ngei turin kan khel ang," tiin chak a inring.
Zo United hian Shillong club Royal Wahingdoh aṭangin midfielder pahnih C. Laldinmawia leh H. Malsawmtluanga te an lalut a, player pahnih hian an thiamna an hloh lo tih an lantir tawh.
BVT lamin Wahingdoh aṭang tho hian midfielder Zosangkima an lalut ve bawk. Player theihna sang tak tak an awm nuk avangin MPL5 match hmasa ber hi a hmuhnawm ang.