Kum 2018-ah Rooney chawl dawn

England captain Wayne Rooney chuan FIFA World Cup 2018 zawhah ram tana inkhelh a chawlhsan tur thu a sawi. Rooney chuan, "Russia-a World Cup ka khelh zawhah chuan ka tan international football chawlhsan a hun ve tawh dawn a ni," a ti.

Manchester United forward chuan sawi chhunzawmin, "Kum 16 leka upa ka nihin professional football ka khel ṭan a, kum 17 ka nihin ram tan koh ka ni. Kum 15 chhung ram tana khelh chu a rei mah mah a, Russia World Cup-ah chuan kum 34 ka ni tawh dawn," tiin kum hnih dang a khelh leh chuan a tan a tawk tur thu a sawi.

England tan vawi 115 inlana goal 53 khungtu striker chuan, "International career duhawm tak ka hmang a, ram tana ka hun hman minute tinte kha nuam ka ti em em vek a ni. Russia World Cup hi ka hun tawp a nih tawh dawn avangin inchhuang taka England jersey ka hlip theih nan theihtawp ka chhuah ang," a ti.

Pathianni zan dar 9:30-ah England hian 2018 World Cup qualifier-a an match hmasa ber chu Slovakia nen an khel dawn a, Wayne Rooney hi a inlan a nih chuan goalkeeper ni lo England player zinga ram tana inlan hnem ber David Beckham-a record a khum ang.