US Open Andy Murray a chak nuamsa

US Open 2016 seeded pahnihna Andy Murray chuan nimin zing khan a match hmasa ber khelin harsatna nei loin Lukas Rosol chu darkar khat leh minute ruk chhung lekin 6-3, 6-2, 6-2 in a hneh nghal. Seeded pathumna Stan Wawrinka leh Juan Martin del Potro te pawhin second round an lut ve bawk.

Arthur Ashe Stadium-a inkhelah world number 2 Murray hian vawi 11 ngawt ace siamin double fault vawi 1 chiah a nei a, unforced errors vawi 17 nei bawkin a khingpui service hi vawi 5 a chhuhsak bawk - an inkhelh hun chhung zawng hian dinhmun hlauhthawnawmah a ding miah lo.

Rio Olympic champion Mur-ray chuan, "Ka service a ṭha a, kha vang khan inkhelh a awl-sam phah. Break point vawi khat mah ka pe miah lo kha chu ka beisei phak loh a ni hial zawk," tiin a sawi.

Inkhel dangah 2009 cham-pion Del Potro pawhin Louis Arm-strong Stadium-ah first round khelin Diego Schwartzman chu 6-4, 6-4, 7-6(3) in a hneh. Emirates ATP Ranking-a 100-na hnuai lam a nih vangin Del Potro hi kuminah hian US Open buatsaih tuten wildcard an pe a, second round-ah chuan world number 19 Steve Johnson a hmachhawn leh dawn a ni.

Argentina tlangval Del Potro chuan, "Kum thum hnua helai hmuna ka lo kir leh thei hi ka lawm hle. Vawi khat min zai hnu khan tennis chawlhsan ka tum hman hial a, ka beidawn duh loh avangin a vawi hnihna leh ṭum thumna pawh ka paltlang a, tunah chuan harsatna liantham nei loin ka inkhel ve leh thei ta," tiin a sawi.

World number 4 hlui Del Potro hi player ṭha tak ni mah se a vanduai a, a ban rek hi vawi thum zai ni tawhin nikum khan tennis court chhungah a lo kir leh chauh. Rio Olympic-ah khan an ram aiawhin Novak Djokovic leh Rafael Nadal te hnehin silver medal a dawng.

Grand Slam vawi hnih cham-pion tawh Wawrinka pawhin semifinal a la luh ngai lohna hmun US Open-ah beiseina a nei thar leh. Swiss thiampuipa hian Spain tlangval Fernando Verdasco lakah fiahna hautak paltlang nghalin 7-6(4), 6-4, 6-4 in hnehna a chang.