Juve tan Ronaldo a zuang sang Serie A record tharin a hmuak

Cristiano Ronaldo goal hnih hmangin Juventus chuan Parma 4-0 in an sawp a, Italian champion hian Serie A nomawi an kawl lai humhim turin kawng dik an zawh - pathumna niin an chungah AC Milan leh Inter Milan an la awm.

Goal hnih khungtu Ronaldo-a'n kum 2020 chhungin league goal 33 a khung ta a, 1961 daih tawha Omar Sivori-a‘n Juve tana record a lo siam tawh chu a nih rual. Serie A player zingah kum khat chhunga goal 33 khung thei player palina a ni chiah bawk.

Old Lady hian kumina an match hnuhnung ber atan Thawhlehni zan hian Fiorentina an mikhual dawn. Portuguese forward hian goal a khung leh a nih chuan Juve tan kum khat chhunga league goal khung hnem ber record a siam ang.

Andrea Pirlo nauten kuminah beisei angin season bul an ṭan lo, match 12 an khelh chinah tlawm nei lo mah se vawi ruk ngawt an khingpui nen an inhnehtawk - Parma mualah chak tura rinkai ni mah se chak chiang tia sawi ngam erawh an ni bik lo.

Hliam vangin Paulo Dybala, Arthur, Giorgio Chiellini leh Merih Demiral te an chhawr thei lo vek a, kum 42 mi keeper Gianluigi Buffon leh Dejan Kulusevski ten inkhel bul an ṭan thung. Bianconeri hian inkhel an thunun a - Dejan Kulusevski, Ronaldo leh season duhawm hmangtu Alvaro Morata te chuan a khat mawi tawka goal in khung chhawkin an team an chakpui a, khualmualah point thum hlu tak an hlawh chhuak.

Kum 35 mi a ni tawh a, a rualpui player tam zawk an chawlh tawh bakah league nem zawkah an khel tawh. Ronaldo erawh a ṭha ber zinga mi a la ni reng, goal khung a la chawlhsan thei lo - a khung zel dawn ni pawhin a lang.

Real Madrid forward hlui hian tun season Serie A match vawi kua a khelhah pawh goal 12 a khung, a ṭhiante khung tur vawi khat a siamsak bawk. Italian club tan hian league match 73 a khelh tawhah goal 63 a khung tawh a ni.

Ronaldo hian Serie A nomawi pawh vawi hnih a chawi leh der tawh a, a sulhnu sawi nep theih a ni lo. Chutihrualin Old Lady lamin an lakluh chhan chu Champions League a ni a, a hlawhtlinpui leh a nih ngat chuan a ropuina a chhah zual ang.

Senior team enkawl thei tura coaching license a neih hnu lawkah Pirlo-a'n Juve a kaihruai a, team enkawl kawngah tawnhriat a neih loh avangin beisei san a har. Sawiselna karah Italian manager a ding nghet viau a, tunah chuan a nauten a duh anga an khelh thu a sawi.

Pirlo chuan, "Kan match hnuhnung ber zawkah khan Atalanta nen kan inhnehtawk a, kan khel ṭha tawk lo. Keimah chauh ni loin player dangte pawh point thum kan hmuh loh vang khan an lungngai, tunah erawh duhthusama ṭhain kan khel. "A bik takin Ronaldo khan hma a sawn, penalty a hlah vanga sawiselna awm chu goal ṭha tak pahnih hmangin a rawn chhang. Ani hi chu goal khung châka tuihal reng a nih avangin goal dang pawh a la khung zel ang," tiin a sawi.

Serie A Results

Fiorentina    1 - 1    Hellas Verona

FIO : Dusan Vlahovic 19‘ (P)

HEL : Miguel Veloso 8‘ (P)

Sampdoria    3 - 1    Crotone

SAM : Mikkel Damsgaard 26‘; Jakub 

Jankto 36‘; Fabio Quagliarella 65‘

CRO : Simeon Tochukwu Nwankwo 45+1‘ (P)

Parma    0 - 4    Juventus

JUV : Dejan Kulusevski 23‘; Cristiano 

Ronaldo 26‘, 48‘; Alvaro Morata 85‘