Messi record siam zanah Barca chak zo lo

Lionel Messi-a'n Barcelona tan record siamin a goal 643-na khung mah se Catalan club hi hnehna a chanpui zo lo a, an mikhual Valencia nen 2-2 in an inhnehtawk. Valencia hian minute 29-naah defender Mouctar Diakhaby hmangin goal hmahruai an khung a, corner aṭanga ball kal tauh luttu Diakhaby hian vengtu a nei lo. 

Barca tan first half hun pek belhah Antoine Griezmann-a'n penalty a hlawh chhuak a, Messi chuan a pet - Argentine forward penalty hi Valencia keeper Jaume Domenech chuan dang zet mah se he penalty aṭanga ball kal zel hi Messi chuan a tauh goal leh ta tho. Messi-a'n Barcelona tan match 748-a khelha goal 643-a khungna chiah a ni a, club pakhat tana goal khung hnem lamah Santos tana Pele-a record lo siam tawh chu a nihrual.

Barca-in inkhel an thunun zui a, Uruguayan defender Ronald Araujo chuan scissor-kick hmangin Catalan club hmahruaina goal mawi zetin a khung zui. Mahse, Barca vanneih zan a ni lo - Valencia tan Maxi Gomez chuan si phurh a sut ve leh a, Philippe Coutinho-a'n Barca chakpuina hun ṭha nei mah se a chhawr loh avangin 2-2 in inkhel a tawp. La Liga inkhel ngaihven hlawh dangah hmahruaitu Atletico Madrid chuan 3-1 in Elche an hneh a, Luis Suarez chuan goal hnih khungin substitute Diego Costa chuan penalty aṭangin a khung bawk - Elche tana Lucas Boyle goal khungin awmzia a nei lo.