Maharashtra Open sawn dawn

India rama tennis inelna ngaihhlut Maharashtra Open chu a hun pangngaiah khelh theih a ni dawn a, inelna buatsaihtu chuan mipa tennis thuneitu sang Association of Tennis Professionals (ATP) nena inbe pawpin a hun an sawn tur thu an sawi.

Nakkum January thlaa khelh tur Australian Open chu February-a khelh turin an sawn chiang tawh, Melbourne khawpuia inelna neih tur an sawn hun leh Maharashtra Open 2021 khelh hun a in nanchin dawn avangin India rama mi zawk hi sawn ve leh a ngai dawn.

Tournament director Prashant Sutar chuan, "Infiamna khawvel hi Covid-19 tuar nasa ber zinga mi kan ni a, harsatna hi mi hrang hrangin an tawrh tur chauh a ni bik lo, kan chungah pawh a thleng ve thei a ni tih chu a takin a lang.

"Asia khawmualpui chhim lamah chuan Tata Open hi ATP Tour event awmchhun a ni a, a hun pangngaiah kan khel thei lo a nih pawhin tournament chu kan buatsaih ngei ang," tiin a sawi a, a hun sawn dan tur erawh an la sawi chiang thei lo.

Maharashtra Open khelh hnuhnung berah khan Czech Republic player Jiri Vesely a champion a, doubles huangah Andre Goransson leh Christopher Rungkat te chuan hlawhtlinna an chang ve bawk.