Premier League transfer Pound tluklehdingawn 1.165 hman a ni

Nimin zing dar 3:30-ah Premier League club-te tan nipui transfer bazar a tawp a, zing dar 1:00-a nihin pound tluklehdingawn 1 khat an hman tlin tawh avangin nikum nipui bazar-a Premier League club-te sum sen zat pound maktaduai 870 chu an khum chiang hle.

Premier League club 13-in an club transfer record khumin player an lalut a, club 20 sum sen belhkhawm hi pound tluklehdingawn 1.165 niin transfer tawp nia Premier League club-te sum sen zat chu pound maktaduai 155 a ni. Kum 2013 nipui bazarah khan Premier League club ten pound maktaduai 140 sengin record an siam a, he record hi tun nipui transfer hian a khum ta a ni.

Khawilam sum nge?

Sky leh BT Sport-in kum 2016 aṭanga 2019 thleng Premier League chhuah phalna an lei a, an leina zat chu pound tluklehdingawn 5.136 a ni a, kum 2013-16 chhunga TV deal aia a tamna chu pound tluklehdingawn hnih lai a ni. TV deal aṭangin club sum lakluh a pung a, hei hian transfer bazar-ah nghawng thui tak a nei lo thei lo.

Kumin nipui transfer bazar-a sum sen hian record thar a siam mai a ni lo, transfer window system Premier League-a pang-ngai taka kalpui a nih hmasak ber kum 2003-04 season-a sen zat pound maktaduai 215 chu a chhuk en chiang hle.

Player langsar

Manchester khaw club pahnihin sum sen belhkhawm chu pound maktaduai 150 aia tam ve ve a ni a, Jose Mou-rinho-a enkawl United-in khaw-vel player manto ber ni tura pound maktaduai 89-a Juventus aṭanga an lakluh Paul Pogba chu player langsar bera chhal ngam a ni. Sum hmang tam
ṭhang Mourinho hian Armenia midfielder Henrikh Mkhitaryan leh Ivory Coast defender Eric Bailly chu pound maktaduai 60-in an lalut bawk.

Pep Guardiola enkawlna hnuaiah Manchester City an insum bik lo. Everton defender John Stones chu khawvela defender manto pahnihna ni turin pound maktaduai 47.5-in an lalut a, Schalke aṭanga midfielder Leroy Sane lakluh nan pound maktaduai 37 a theh chhuak bawk.

Antonio Conte-a'n Stamford Bridge-a a season hmasa berah pound maktaduai 120 a seng nghal a, Paris St-Germain
aṭanga pound maktaduai 34-a David Luiz a lak let chu a sum senna langsar ber niin Marseille aṭanga Belgium striker Michy Batshuayi lalut tura a sum sen zat chu pound maktaduai 33 a ni.

Sum hman hreh ṭhin Arsene Wenger meuh pawhin Granit Xhaka leh Shkodran Mustafi lakluh nan pound maktaduai 70 a theh chhuak a, Liverpool boss Jurgen Klopp-a'n an club chanchina player manto ber ni turin Sadio Mane chu pound maktaduai 34-in a lalut bawk.

Player manto

Paul Pogba Manchester United £89m

John Stones Manchester City £47.5m

Leroy Sane Manchester City £37m

Granit Xhaka Arsenal £35m

Shkodran Mustafi Arsenal £35m

David Luiz Chelsea £34m

Sadio Mane Liverpool £34m

Michy Batshuayi Chelsea £33m

Moussa Sissoko Tottenham £30m

N'Golo Kante Chelsea £30m

Club record player

Manchester United Paul Pogba (£89m)

Bournemouth Jordon Ibe (£15m)

Liverpool Sadio Mane (£36m)

Sunderland Didier N'Dong (£13.6m)

Crystal Palace Christian Benteke (£32m)

Hull Ryan Mason (£13m)

West Ham Andre Ayew (£20.5m)

West Brom Nacer Chadli (£13m)

Leicester Islam Slimani (£29m)

Watford Roberto Pereyra (£13m)

Southampton Sofiane Boufal (£16m)

Burnley Jeff Hendrick (£10.5m)

Swansea Borja Baston (£15.5m)

Note: £ = pound m = maktaduai

Ngaihnawm

• Premier League club ten chawhrualin nipui transfer bazar-ah pound maktaduai 60 ṭheuh seng ang an ni.

• Champions League khel tur Arsenal, Leicester City, Manchester City leh Tottenham Hotspur te sum sen belhkhawm chu pound maktaduai 385 a ni.

• Kalphung pangngai taka transfer window kalpui a nih hnuah pound tluklehdingawn 8.6 sen a ni tawh a, heng zinga 80% hi chu nipui bazar-ah sen a ni.