Basti-a'n mittui nen Germany kawr a phelh

Germany captain Bastian Schweinsteiger chuan an ram jersey ha leh tawh lo turin Nilaini zan khan mittui nen kum 12 chhung a lo hak tawh jersey chu a hlip.

Germany hian Finland nen friendly match an khelh tur hi Schweinsteiger leh Lukas Podolski thlahna tur a nih thu an lo sawi lawk tawh, harsatna nei loin 2-0 in hnehna an chang. Arsenal srtiker hlui Poldi hi hliam vangin inlan ve thei lo mah se Schweinsteiger erawh minute 66 chhung a inlan a - khelmual a chhuahsan dawnin mipuiin amah zah lantir nan ding chungin an thlah.

2014 FIFA World Cup cham-pion-na kawnga player pawi-mawh Schweinsteiger chuan, "In tana inkhel theia ka awm hi ka tan inchhuanna tham a tling a, vawiin kan hun hman hi hlim taka hman pawh ka duh, eng tiang chiahin nge ka thinlung a khawih tih chu min hmuh thiam pui ve ngei pawh ka ring - hetiang em ema hun ropui a nih hi ka ring phak lo hial zawk," tiin fan-te hnenah thlahna thu a sawi.

A vanglaia khawvela mid-fiel^-der ṭha berte zinga mi Schwein-steiger hi tun dinhmunah chuan Jose Mourinho mit a tlung zo lo a, nipui transfer a zawh tak bawk si avangin Manchester United reserve team lama awm tura ngaih a ni.

Kum 32-a upa Schweinsteiger chuan, "United tan hian kum 2018 thleng contract ka nei a, ka duhthusamah chuan hman zawh vek ka duh. Football hi ka ngainain inkhelh nuam ka la ti a, khelmual chhunga hun hman chhunzawm theihdan tur hi ka ngaihtuah chu a ni," tiin a sawi.

Schweinsteiger hian Germany tan match 121 a khelh aṭangin goal 24 a khung a, ram tan ani aia khel tam pali chiah an awm. European Championship-ah bik chuan vawi 18 inlanin record nei ṭha ber a ni.