Moukoko goal khung zanah Dortmund chak lo

Borussia Dortmund forward Youssoufa Moukoko-a'n goal ropui khungin Bundesliga-a goal khung thei naupang ber ni mah se Union Berlin lakah 2-1 in an chak lo. Pathumnaa awm RB Leipzig pawh goal awm loin FC Cologne nen an inhnehtawk bawk.

Zirtawpni zan inkhelah Union Berlin-in Liverpool aṭanga loan hmanga an hawh Taiwo Awoniyi hmangin minute 57-naah hma an hruai a, Dortmund-in Youssoufa Moukoko hmangin minute thum hnuah an sut.

Amaherawhchu mualneitu Union Berlin tan Marvin Friedrich-a'n minute 78-naah chakna goal a khung. Berlin hian point 21 hmuin panganaah an awma, an chunga awm Dortmund hi point khat chauhin an pha lo.

Borussia Dortmund-in inhliam vangin Erling Braut Haaland an chhawr thei lo a, Youssoufa Moukoko-a'n hun ṭha a neih phah. Kum 16 leh ni 28 mi Moukoko hian minute 60-naah Raphael Guerreiro ball pek chu a ke vei lamin kawh zetin a pet goal.

Moukoko hi Cameroon-a piang ni mah se Germany Under 20 tan a khel mek a, tun season aṭangin senior team tan a khel ṭan. November 22 khan kum 16 a tling a, Hertha Berlin nen an inkhel ṭuma inlanin Bundesliga khel thei naupang ber a ni.

December 9 khan Moukoko hi Champions League-ah Dortmund leh Zenit St Petersburg inkhelh ṭumin a inlan a, Europe-a club inelna sang bera khel thei naupang ber a ni.

Borussia Dortmund-in kar liam ta Inrinni khan an mualah Vfb Stuttgart 5-1 zetin an hneh lo a, manager Lucien Favre an ban. German club hian tun season chhung team enkawl lai lawk turin assistant coach Edin Terzic an ruat.

Terzic hnuaiah hian Werder Bremen 2-1 in an hneh hram a, Union Berlin lakah 2-1 in an tlawm zui. Borussia hi champion lai Bayern Munich elpha tura ngaih ni mah se Bavarians nena an inkarah Bayer Leverkusen leh RB Leipzig te an awm.

Dortmund hian Thawhlehni zan hian DFB-Pokal second round-ah 2. Bundesliga club Eintracht Braunschweig an hmachhawn dawn a, insiamṭhatna hun ṭha a ni thei ang.