Rafael Nadal khelṭha tluang

Nimin zing khan a vawi khat nan US Open 2016 khelhna hmunpui ber Arthur Ashe Stadium chu a chung khuh a ni a, second round inkhelah Rafael Nadal chuan Andreas Seppi hnehin season khat chhunga Grand Slam hnuhnung berah hnuhma danglam a siam.

Flushing Meadows, New York-ah seeded palina Nadal hian Italy tlangval Seppi hi 6-0, 7-5, 6-1 in a hneh. Spain star Nadal hi a khel ṭha hle a, set hmasa berah game a hloh miah loh a, set hnihnaah a service vawi hnih hloh ve mah se a talbuai phah chuang lo a - nuamsa takin third round a lut.

Australian Open khelhna hmunpui ber Rod Laver Arena leh Wimbledon khelhna pui ber Centre Court te hi ruah a sur pawh a inkhel a buai loh nan a chung khuhna siam a ni tawh a, kuminah a vawi khat nan Arthur Ashe Stadium chung khuhna US dollar maktaduai 150 senga siam chu an hmang ṭan bawk.

Ti hian Grand Slam pali zingah French Open chiah a chung khuhna nei lo a ni ta a, he inelna buatsaih tute chuan kum 2020-ah chuan Court Philippe Chatrier chu khuh ve hman turin ruahmanna an siam mek.

US Open ni hmasa ber leh ni hnihnaah khua a ṭhat avangin Arthur Ashe Stadium hi khuh a ngai lo a, Nadal leh Seppi ten set hnihnaa 3-3 a nih laiin khuh a ngai a, minute 5 leh second 35 chhunga inkhuh zoin Nadal hi US Open bikah indoor stadium chhunga hnehna chang thei hmasa ber a ni.

United States Tennis Asso-ciation Executive Director Gor-don Smith chuan, "Mipuiin inchung khuh lai kha hmuhnawm an ti ve hlein ka hria, inkhel kha minute sarih leh second 22 chhung chauh chawlh lailawk a ngai a, kum danga ruahin final inkhel a lo tihbuai fo tawh ang kha kan pumpelh theih dawn tak avangin a lawmawm hle," tiin a sawi.

Grand Slam vawi 14 cham-pion tawh Nadal chuan, "History siam nia ka tel ve thei hi ka lawm a, hnehna ka chang hi ka lawmna ti zualtu a ni. Kan inkhelhna hmun hi stadium lian tak a nih avangin thli a thaw tam lo a, inchung khuh a nih hnuah pawh khan danglamna ka nei hran lo," tiin a sawi.