2:30 PM Chhinga Veng Vs Chanmari West 7:00 PM Dinthar Vs Ramhlun North
Aizawl veng lian Chanmari West hmaah veng lian dang Chhinga Veng chu vawiin tlai dar 2:30 hian fiahin an awm dawn. Zanin dar 7:00-ah ṭantu nei
ṭha Ramhlun North leh Mizoram Premier League champion hmasa ber Dinthar FC an inkhel dawn - hei hi MPL5 a ni.
MPL5 a inṭan ta a, Lammuala inkhel en man hi Rs 30 chauh a ni a, chhun lama buai tan zan lam thlengin inkhel en tur a awm.
Chanmari West nge Chhinga Veng?
I Day Football-ah Chanmari West-in Chhinga Veng lamah goal thum an khung a, hetiang zat bawk hi MPL kaithar hian West Warrior lamah an khung.
Team pahnih inkarah inchhuang tur an awm lo, I Day Football-ah semifinal an thleng pha lo ve ve a, MFA Super Cup-ah first division club hneh loin an tla ve ve.
Transfer hun laia thawm an neih len avangin Chhinga Veng FC-in ngaihven an hlawh a, amaherawhchu MPL ṭan hmaa vawi nga inkhelah hneh an neih loh avangin mipui beisei an pha lo.
Coach Lalremtluanga chuan, "Result ṭha kan nei lo chungin club hotuten tun thlengin pressure min siam lo a, player-te nen kan vanneihzia ka hria. Chutih rualin kan club hotute leh vengchhung mipuite rulh ve kan duh a, kan inkhelte en lêtin rim takin kan thawk bawk. Tunah hian I Day Football-a Chanmari West kan draw ṭum ai khan kan
ṭha tawh zawk," tiin Vanglaini palai a hrilh.
Chhinga Vengin tlar hnung thuam chak nan MPL-a tawnhriat nei tawh Dinthangpuia an lakluh bakah Dinthar FC aṭanga an lakluh Lalramfelpuia a dam tawh bawk. Goal khung turin Kelkang tlangval Lalkhawpuimawia bakah MS Dawngliana leh H. Lalmuankima te an kawl a, an result ang ngawta en chi an ni lo.
Chanmari West coach HC Zarzoliana chuan, "Chhinga Veng hian chak an la neih loh avangin khelh an harsa sawt ang. Chutihrualin kan team pawhin hma kan sawn a, Nilaini zan khan jersey tlangzarhna kan nei a, veng chhung mipui pawh an phur khawp mai. Chanmari West mipui hian MPL5-a kan match hmasa ber aṭanga a tawp thleng min ṭawiawm ngei ka beisei," tiin mipui
ṭawiawmna an mamawh thu a sawi.
West Warrior forward Laldampuia leh R. Laldanmawia ten I Day Football-ah an pahnihin goal sarih an khung a, captain Dampuia hi top scorer a ni nghe nghe.
MFA Super Cup-ah Chawnpui FC hneh lo mah se an chak loh ṭum hian an defender pawimawh R. Lalawmpuia, midfielder Lalmuansanga leh forward H. Lallianzama te an awm loh avangin chhuanlam siam duh chu ni se sawi tur nei lo an ni lo.
Dinthar tan phuba
I Day Football-ah Dinthar FC-in BVT hnehin bul ṭan mah se semifinal luh beiseina titawptu chu Ramhlun North FC an ni a, MPL kaithar hi 1-2 in an hneh lo.
Dinthar coach Lalchhuanawma chu Germany-a kal tur naupang training petu tur zinga thlan a nih avangin coach a ni tawh lo. MPL champion hmasa ber Dinthar hi Luangmual FC bodd hlui Lalrintluanga (Saitea) hnuaiah an khel ang.
Dinthar coach thar Saitea chuan, "Ramhlun North kan hneh loh chhan kha own goal vang a ni a, MFA Super Cup-ah Mizoram Police hneh lo mah ila inkhel kan thunun avangin kan khel ṭha tih a chiang. LCh-a'n hna harsa a thawk tawh a, keini lamin a rah seng kan tum ang. Team ṭha zinga chhiar tel tur kan ni loa, kan match apiangah point hmu turin theihtawp kan chhuah ang," tiin coach kal chhuak ta a fak.
Ramhlun North coach Lalruatliana Sailo (Tawia) pawhin inchhuang thei an nih loh thu a sawi a, Tawia chuan, "I Day Football-ah final lut mah ila MFA Super Cup-ah division hnuai zawka awm lakah kan chak lo nghal. Dinthar nen pawh hian kan inkhelh tawhna result vang hian kan dinhmun a ṭha zawk tihna a ni lo. Kan team-in hma kan sawn tih kan hria a, team dang pawhin practice-na hun an neih ve tho avangin inhrosa thei kan ni lo," tiin a ṭawng fimkhur hle.
MFA Super Cup-a Ramhlun North chak loh ṭumin player pawimawh Vanlalthlamuana chu squad-ah dah a ni lo a, Dinthar FC hmachhawn tur hian Chanmari FC forward Malsawmfela nau hi a inlan tawh ang.
Zanin inkhel tur team pahnih hi player-ah an intluk tawk a, mipuiah erawh tun season bikah chuan Ramhlun North an chungnung hle. MPL kaitharin champion hmasa ber an auh zam mai loh nan Maimawms-te Lammual lamah an tam a ṭul dawn a ni.