Samir Nasri-a'n Sevilla a zawm

Manchester City midfielder Samir Nasri chuan nipui transfer tawp niin Europa League champion Sevilla a zawm - La Liga club tan hian season khat chhung loan-in a khel dawn a ni. Man City hian central defender Eliaquim Mangala pawh Valencia-ah loan thoin an chhuahtir bawk.

City manager Pep Guardiola-a'n season thar inbuatsaihna an neih lai khan Arsenal player hlui Nasri hi team training naah telh loin amahin a training tir a, hei hi a chhan chu a rih dan tur baka a taksa a rih belh vang a ni.

Guardiola hian Nasri hi league match hmasa pahnihah chhawr duh loin an match hnuhnung bera West Ham 3-1 a an hneh ṭum khan bench aṭangin tlan luh tir ve mah se chhawr zui atan a duh lutuk hran lo tih a hriat.

Kum 29-a upa Nasri chuan, "Kum nga chhung hun nuam leh hlimawm ka hmang a, City hian seasaon duhawm taka a hman chhoh theih nan duhsakna ka hlan," tiin a sawi.

Man City hian an goalkeeper Joe Hart chu Serie A club Torino lamah loan hmang thoin an lo chhuahtir tawh bawk a, tun nipui chung hian player 7 ngawt loan hmangin an chhuahtir a ni.

Valencia inthuam thar

Valencia hian Arsenal lakah German international Shkodran Mustafi chan mah se an tlarhnung an thuam chak nghal a, Zenit St Petersburg aṭangin Argentina international defender Ezequiel Garay chu kum li chhung atan an lakluh bakah Man City aṭangin Mangala an hawh bawk.

Kum 29-a upa Garay hian Real Madrid tan match 31 khel tawhin Copa del Rey champion tawh a nih avangin Spain-ah hian a mikhual dawn lo. Russia-ah pawh kum hnih hun a hman chhungin league nomawi bakah Russian Cup leh Super Cup te a chawi bawk avangin Valencia tan a tawn hriat hi a ṭangkai hlein a rinawm.

Spanish manager Guardiola-a'n a tlar hnung ti chak turin Everton aṭangin John Stones chu pound maktaduai 47.5 zetin a lalut. English defender hian kum hnih liamta a City-in Porto aṭanga pound maktaduai 32 zeta an lo lei tawh Mangala hi a nek chhuak a ngaih a ni.

Kum 25-a upa Mangala hi a club hlui Porto chuan lakluh duh ve bawk mah se Arsenal laka defender Shkodran Mustafi hralh hlim Valencia hian an chuh chak ta zawk a, season khat chhung an hawh ang. Valencia hian Mustafi chhuahtir mah se a hmunruak hnawh khat tura an lakluh thar pahnihte hming hi a hrawl hle.