Raonic leh Muguruza an tla

US Open 2016 khelh mekah second round chauh la ni mah se player langsar an tla nghal zel! Nilaini zan khan mipa singles-ah Wimbledon finalist Milos Raonic a tla a, hmeichhe singles-ah French Open champion Garbine Muguruza a chak lo bawk.

Flushing Meadows, New York-a inkhelah seeded pangana Raonic hi khawtual tlangval Ryan Harrison lakah 6-7 (4-7), 7-5, 7-5, 6-1 in a chak lo. Harrison hi ATP ranking-ah number 120-na daih a nih avangin Raonic tan second round-a tlak hi mualphona a ni.

Kum 25-a upa Raonic hian season duhawm tak a hmang a, Australian Open-ah semifinal lutin Wimbledon-ah final a lut bawk, heng inelna lian pahnihah te hian world number 2 Andy Murray a hneh lo ve ve thung. Tun ṭumah hian player beisei-awm ber pawl nichungin beisei a phak lo hle.

Champion lai leh world number 1 ni bawk Novak Djokovic chu ball vuak hah ngai loin third round a lut. Serbian thiampuipa tumpui tur Jiri Vesely chu a ban veilam na vangin a inhnukdawk a ni. Marin Cilic, Gael Monfils leh Jo-Wilfried Tsonga te pawhin second round an paltlang ve bawk.

Hmeichhe lam

Seeded pathumna Mu-gu-ruza chu Latvia nula Anas-tasija Sevastova lakah 7-5, 6-4 a chak loin second round-ah a tla nghal. Muguruza hi a vawi khat nan Arthur Ashe Stadium-ah a in-lan a, world number 48 Sevastova lakah set khatna a hloh hnuin set hnihnaah pawh 5-1 in a hniam fal leh hnuah 5-4 nih pui thei mah se a service ṭum sarih ngawt a hum zawh loh avangin a tla.

Inkhel dangah US Open final vawi hnih khel tawh Caroline Woz-niacki chu he hmuna lo champion tawh Svetlana Kuznetsova nen an in-hma-chhawn a, world number 1 hlui Wozniacki hi 4-0 zetin a tirah hniam zawk mah se 6-4, 6-4 in hnehna a chang let a - nikum Wimbledon hnua a vawi khat nan Grand Slam inelnaah second round a paltlang.

World number 2 Ange-lique Kerber-i'n har-sat-na liantham a la tawk lo a, Croatia nula Mirjana Lucic-Baroni chu 6-2, 7-6 (9-7) in a hneh. German nula hian khawtual nula Shelby Rogers hnehtu kum 17 chauha upa Cici Bellis a hmachhawn leh dawn a ni. Seeded chang phak zingah Roberta Vinci, Dominika Cibulkova, Johanna Konta leh Petra Kvitova te pawhin second round an paltlang ve bawk.