Chelsea-ah David Luiz a kir

Antonio Conte hnuaia insiamṭhat tum Chelsea chuan an defender hlui David Luiz chu Paris St-Germain aṭangin pound maktaduai 34-in an lalut a, a rual hian left-back Marcos Alonso chu Fiorentina aṭangin pound maktaduai 23-in an lalut bawk.

David Luiz hian January 2011 khan Benfica aṭangin Blues hi pound maktaduai 23-in a zawm a, match 143 a inlan hnuah kum 2014 khan PSG chu pound maktaduai 40 bawr velin a zawm a, Stamford Bridge-ah hian kum thum chhung atan contract a ziak a ni.

Brazil tana vawi 56 inlan tawh defender chuan, "Chelsea-a ka kum hmasaah khan sulhnu ropui tak kan hnutchhiah a ni," tiin Champions League, FA Cup leh Europa League nomawi a lo chawi tawhna club-ah chuan hlawhtlinna a chhar belh a inbeisei thu a sawi.

Spanish defender Alonso tan Chelsea a zawm hi Premier League club pathum-a a khelhna tur a ni thung. Spain tana la inlan lo defender hian kum 2010-2013 chhung khan Bolton Wanderers tan a khel a, kum 2014 khan Sunderland-ah thla li chhung loan-in a khel tawh bawk a ni.

Kum 25-a upa defender chuan, "Nomawi chawi hi ka tan a hun ve tawh a ni," tiin Chelsea a zawm chhan a sawi. Blues hian defender Baba Rahman chu Schalke-ah loan-in an chhuahtir thung a, winger Juan Cuadrado chuan season thum chhung atan loan-in Juventus a zawm bawk.