Pakistan bowler Amir a chawl

Pakistan pace bowler Mohammad Amir chuan international cricket a chawlhsan thu a puang. Kum 28 mi Amir hian team enkawltuten an rilru hahna tur an siam nasat avanga chawl a nih thu a sawi.

Kum 2019 khan Amir hian Test match a chawlhsan tawh a, tuna New Zealand-a zin mek Pakistan squad-ah koh a ni lo. Mohammad Amir chuan ,"Koh theih turin ka awm reng a, duhsak ka hlawh lo. Tunah chuan international cricket ka khel duh tawh lo," tiin a lungawi loh thu a sawi.

Amir hian kum 17 mi chauh a nihin Pakistan tan inelna pathum Test, ODI leh T20-ah a khel ṭan a, ram tan match 146 a khel tawh. Test match 36 a khelah wicket 119 a la a, chawhrualin run 30.47 a pe. ODI-ah match 61 khelin wicket 81 (29.62 avg runs) a la a, T20-ah match 50 khelin wicket 59 (21.40 avg runs) a la bawk. Pakistan Cricket Board (PCB) chief executive Wasim Khan chuan Amir-a thutlukna hi an zahsak thu a sawi thung.