Quarterfinal-ah Medvedev a lut

Daniil Medvedev-a'n kum bul a ṭan fuh lo a, a thleng sang hleithei ṭhin lo - tunah chuan kawng dik a zawh dawn ta niin a lang, kumina a vawi khat nan tournament a khelh hoah quarterfinal a thleng ve ta.

Nimin zing Marseille Open inkhelah world number 1 hlui Daniil Medvedev hian Pierre-Hugues Herbert chu 6-2, 6-4 in a hneh a, anni pahnih hi kum 2021 khan final-ah an lo intawng tawh bawk a, hemi ṭum pawh hian Medvedev hi a chak.

Russian tlangval Medvedev hian kuminah Australian Open leh Rotterdam Open a khel tawh a, second round lekah a tla. Tun ṭumah hian wildcard hmangin a inlan a, duhsak a hlawh ang ngeiin result pawh a nei ṭha rih hle.

Medvedev chuan, "Marseille hi ka tan chuan hmun nuam tak a ni a, kuminah pawh nuamti taka a tawp ka khar theih ngei ka beisei," tiin a sawi a, a match lehpekah chuan Jan-Lennard Struff a tum leh ang - German player hian inkhel dangah Hugo Grenier 6-4, 5-7, 6-4 in a lo hneh ve thung a ni.