City-in Akanji chhawr thei dawn lo

Manchester City-in zanin dar 8:30 hian Newcastle United an mikhual dawn a, Manuel Akanji an chhawr thei dawn lo. Switzerland centre back hi Real Madrid nen Champions League-a an inkhelh ṭumin a inhliam a, Akanji zanin bakah Real Madrid leh Liverpool a hmachhawn thei dawn lo.

Pep Guardiola hote hian league match hnuhnung berah 5-1 ngawta Arsenal an hneh loh avangin Premier League nomawi beiseina a bo tawhah a ngaih theih a, hei vang hian Champions League an insawrbing a rinawm.

Chutihrualin thlasik bazarah Man City hi an inthuam ṭha a, table-ah panganaah an tlak thlak avangin season thara Champions League khel turin chak an mamawh hle. Pep-a hote hian Newcastle lakah pawh hnehna chan ngei an tum ang.

City mikhual tur Magpies hian League Cup semifinal-ah Pep-a sawptu Arsenal an hneh ve leh thung a, FA Cup-ah Birmingham 3-2 in an hneh leh bawk. Team pahnih hian point 41 ve ve an hmu mek a, an sulhnu ni loin tun season-a an khelh dan thlirin team pahnih hi an intluk tawh hle.