Swiatek tan nomawi a hnai

Vawi thum a champion tawhna Qatar Open khelh laiah Iga Swiatek chuan nomawi a hnaih leh ta hle, champion turin match vawi hnih chak a la hmabak - Polish nula hian Elena Rybakina hnehin semifinal a lut.

World number 2 Swiatek hian awlsam takin hnehna a chang mai bik lo, seeded pangana lakah hian set hnihna an khelh laiin a hnufual zawk, mahse a tawpah erawh 6-2, 7-5 in a chak zawkah a ṭang.

Grand Slam vawi nga champion tawh Swiatek chuan, "Ka tan chuan inkhel duhthusam a ni, a chhan chu dinhmun ṭha lo hreta kan din hnua thawh chhuah leh theih hi a hlu lai chu a ni," tiin a sawi a, season hmasa tawp lama hun duhawm loh a tawn chu siamṭhat tumin hma lam a pan mek zel a ni.

Swiatek hian a match lehpekah chuan Jelena Ostapenko a hmachhawn leh ang - Latvian nula Ostapenko hian inkhel dangah tun hma lama world number 2 lo ni tawh Ons Jabeur chu 6-2, 6-2 in a lo hneh ve thung a ni.

Inkhel dangah Ekaterina Alexandrova a la chak zel, a khingpui deeded parukna Jessica Pegula chu 4-6, 6-1, 6-1 in a hneh; a match hmasa lamah Aryna Sabalenka a lo hneh tawh bawk a ni.