Juventus mualah Inter Milan

Pathianni zanlai dar 1:15 hian Serie A inkhel pawimawh bik a awm dawn, champion lai Inter Milan chu team ṭha leh hlun Juventus khelmualah an lenglut ang.

Inter Milan hian nomawi humhim ngei tumin thapui an thawh mek, an chunga awm Napoli an ṭhat avang leh an chetsual khat em avangin Juve laka point hloh a pawi thei dawn, thapui an thawh tak meuh ang.

Old Lady hi Italian inelna sang ber season kal laia tlem tlem ber an ni, vawi khat chiah an la tlawm. Mahse, an khingpuite nen an inhnehtawk nasa a, an tan nomawi aiin season thar Champions League ticket chu sawi ngai a ni rih.

Inter Milan hi captain Lautaro Martinez hoin an inlan ang a, Argentina international hi chakpui tham a nihzia an hre fo tawh, chutihrualin match zawng zawnga goal khung tura beisei chi erawh a ni bik lo.

An match hnuhnungah Marcus Thuram chu hliam tenau vanga thlak a ni a, tun ṭumah chuan inlan leh thei nghal tura beisei a ni. Thuram a fit tawk lo a nih pawhin Marko Arnautovic an la nei, tlarhma lam chu an buai lo ang.

Simone Inzaghi-a naute buaina pakhat chu goal an chhuah leh tlat ṭhin hi a ni. Tun season league match 24 aṭanga goal 58 khungin an khung tam ber a, mahse an chunga awm Napoli (17 goals) aiin an chhuah hnem zawk, goal 23 an chhuah tawh.

Fiorentina lakah goal thum an chhuah a, si thum faia an hneh loh Fiorentina bawk hi ni thum hnuah hmachhawn lehin 2-1 in an hneh thung, hmasawnna hmuh tur awm mah se Juve lakah tlarhnung rem uluk an ngai tih chu a chiang.

Juventus tan Serie A nomawi a hla deuh tawh a ni mai thei, beisei bo erawh vek erawh a la ni bik lo. Thlasik bazar lai khan Paris Saint Germain aṭangin Randal Kolo Muani an lalut - France international hian a khel ṭha nghal - Inter tan pawha hna ti tamtu a ni thei ang.

Old Lady manager Thiago Motta chuan, "Tun hnaiah hman kan sawn, kan hmabak chu ball chan tam leh goal nawr nat lehzual a ni. Kan khingpuite laka inkhel thunun tur chuan ball chan tam hmasak a ngai ṭhin.

"A nihna takah chuan Inter Milan lakah hian rinkai lo zawk kan ni ngei ang, mahse mi ten min rin leh rin loh hi a pawimawh ber a ni lo a, engtiangin nge kan khelh chhuah tih kha a pawimawh zawk.

"Ka naute hian match khelh tur ngah mah se, inbuatsaihna hun kan neih ang kan hmang ṭha hle. Chuvangin, kan khelmuala inkhel tur kan ni bawk a, fans puihna nen result ṭha kan neih ka beisei," tiin a sawi.