Dembele dahsangtu Enrique

Paris Saint-Germain manager Luis Enrique chuan a winger Ousmane Dembele chu a dahsang hle a, inkhel harsa bikah pawh danglamna nasa taka siam thei a nih thu a sawi.

Season tir lamah khan Enrique leh Dembele te hian boruak ṭha vak lo an nei, inkhel tura thlan chhuah zingah pawh a telh loh chang a awm hial - tun hnaiah erawh duhthusama ṭha ang maiin an inkawp rem thung.

PSG tana a match hnuhnung 11 aṭanga goal 18 khungtu Dembele chungchang sawiin Enrique chuan, "Krismas lai khan eng nge a ei tih inzawh nawn a ngai lo, tunah chuan a che vel reng rengah hian inrintawkna in a khat tih a chiang hle a ni.

"Kan naupan lai chuan video games ka khel ṭhin, chutiang lai chuan inkhel ti danglam turin player thlan duh bik ka nei ṭhin, khatih hunlaia ka thlan ang mai kha Dembele hi a ni," tiin a sawi.

Enrique enkawl PSG hian Ligue 1 nomawi an hum theih hmel a, nomawi an lak chak zawk Champions League an ngai pawimawh ang - UCL last 16 lut turin playoff an paltlang a ngai dawn.

UCL playoff an khelh leh hmain Ligue 1 an khel leh phawt dawn - zanin dar 1:35 hian Toulouse an lenchilh dawn a ni.