Al Nassr-ah Jhon Duran a vul

Aston Villa aṭanga Saudi Arabia pantu Jhon Duran chu Al Nassr tan a che ṭha zel. February 13, Ningani zan khan Al Nassr-in khualmualah Al Ahli Saudi 3-2 in an hneh a, Jhon Duran hian goal hnih a khung.

Al Nassr hian kum 21 mi Colombian striker Duran hi pound maktaduai 71-in an lalut a, Saudi club-in beiseina an nei sang. Duran hian match thum khel tawhin goal li a khung der tawh.

King Abdullah Sports City-a Al Ahli Saudi an hmachhawn ṭum hian first half-ah Duran hian goal hmahruai a khung a, second half ṭantirhah defender Mohamed Simakan chu hnawhchhuah a ni.

Mualneitu lamin an tamna hmang ṭangkaiin Ivan Toney hmangin siphurh an sut a, mahse player 10-a khel chungin Al Nassr-in hnehna an chang tho. Minute 80-naah Ayman Yahya-a'n hmahruaina goal a khung hnuah Duran-a'n minute 88-naah chak nemghehna goal a khung. Mualneitu lamin injury time-ah Sumayhan Al Nabit hmangin goal khung mah se result a ti danglam pha tawh lo.

Duran chuan, "Cristiano nen ka goal khung kan lawm dun a nia, FIFA Career mode khel ang mai ka ni," tiin Cristiano Ronaldo nena a khelh dun chu nuam a tih thu a sawi. Ronaldo pawh hian Duran nen an inkawp hnuah match thumah goal thum a khung a, Al Nassr-in hnehna an chang vek bawk.