Thla thum chhung atan Sinner an hrem

Jannik Sinner chuan damdawi hman phal loh a hmang tih hriat chhuah a ni a, nikum lama a thil tihsual avang hian thla thum chhung inkhel thei lo tura hrem a ni.

World Anti-Doping Agency chuan nikum khan Sinner hi vawi hnih an endikah dan a bawhchhia tih an sawi a, a tirah hremna hmachhawn nghal mai lo mah se chhui zui niin, tun hnai khan hremna hi a chhuak.

Kum 23 mi Sinner hremna hi February 9 aṭanga chhiar ṭan kha niin May 4 thleng a awh ang - January thla khan Australian Open khelin a champion, tun season chhunga Grand Slam pahnihna French Open pawh a khel thei dawn tho tihna a ni.

Sinner chungchang hi International Tennis Integrity Agency (ITIA) hnuaia chhui chiangtu chuan an lo titawp tawh, dan a bawhchhe lui lo nia ngaiin an tihtawpsak hman hial.

Mahse, WADA chuan infiamna lama thubuai ngaihtuahtu sang Court of Arbitration for Sport (CAS) hnenah a thlen a, Grand Slam vawi thum champion tawh hian a sual leh dan bawhchhiat luih a duh vang ni lo mah se, thil a tihsual avangin hremna hi a hmachhawn ngei a ngai.

Italian tlangval Sinner chuan, "Hetiang thu thang leh buaina hian kum khat deuhthaw chu min chim tawh a, thutlukna a awm thei hi a ṭha zawk. Tih sual palh leh dik lo a awm a nih chuan kei leh ka team chuan kan pawm, mahse tihluih erawh a ni lo," a ti.

Clay court season an hmang ṭan dawn hnai a, a tir lamah Sinner hi a tel thei dawn lo tihna a ni - tournament a khelh theih loh tur zat tak erawh sawi theih a ni lo, inelna lian French Open hma erawh chuan hremna a hmang zo hman dawn.

Tun dinhmunah Sinner hian world ranking-ah point 11,830 hmuin a chuang berah a awm mek, a hnuaiah German tlangval Alexander Zverev (8,135 points) leh Spainish player Carlos Alcaraz (7,510) te an awm.

Hrem a nih chhung hian Miami Open, Indian Wells, Monte Carlo Masters leh Madrid Open te khelh a ni dawn a, heng tournament-te hi ranking point 1000 awmna an ni hlawm, a dang erawh ranking point 250 leh 500 awmna te an ni.

Amah hnaihtu pahnih te hi an khel ṭha a, nomawi an chawi a nih chuan Sinner hi number 1 dinhmun aṭangin an nek chhuak hman dawn. Mahse, number 1 dinhmun luah tur erawh chuan tournament pakhata champion chauh chu a tawk dawn bik lo a ni.