Moyes enkawl Everton an danglam
David Moyes chuan a hming chher tawhna Everton tan thil duhawm a ti chhunzawm zel - Inrinni zan Premier League inkhelah Moyes leh a naute hian Crystal Palace chu 2-1 in an hneh.
Selhurst Park-a inkhelah tunlaia khel ṭha thei tak Beto chuan Toffees tan goal hmahruai a khung a, chawlhlawk hnu lawkah Palace striker Jean-Philippe Mateta chuan a sut.
Hun ṭha tak tak an khawhral hnuah, hun tawp dawnah Everton tan Carlos Alcaraz chuan chakna goal a khung. Daichi Kamada-a goal shot hmasa chu lo dansak mah se Alcaraz hian lo chang fuhin chiang zetin a khung.
Everton hian an chet chhiat em avangin Sean Dyche an ban - January thla khan tun hma lama an manager lo ni tawh Moyes an lalut, tun hnaiah EPL match an khelh hnuhnung paruk zinga paliah hnehna an chang a ni.
Kum 61 mi Moyes chuan, "Ka kir leh hnua kan chet dan hi duhthusam a ni e. Ka naute hian Everton tana khel an ni tih an hrechiang a, ka tan chuan thlamuang taka awm theih a ni, theihtawp chhuahte chuan result ṭha an sual chhuak ṭhin.
"Kar laihawlah match hautak kan khel a, mi ṭhenkhat chuan kan zuih mai an ring. Mahse, match hautak kan khelh khan chakna min siam belh zawk a ni," tiin Liverpool nen an inhnehtawk chuan nghawng ṭha a nei tih a sawi.
Tlak hlau zinga mi ni ṭhin Everton kha tunah chuan 13-naah an awm tawh a, inhamtan ai chuan season thara European football khelh dan chu an ngaihtuahna luahtu a ni leh tawh zawk ang.
Inrinni zan inkhel dangah Aston Villa chu player kim loa khel Ipswich Town nen 1-1 in an inhnehtawk. Chawlhlawk hmain Axel Tuanzebe chu Jacob Ramsey a tihtluk avangin hnawhchhuah a ni.
Player tlem zawk Ipswich Town lamin Liam Delap hmangin goal an nei hmasa ta tho a, mahse Villa striker Ollie Watkins chuan sutin goal dang a lut lo. Manchester United aṭanga loan hmanga an hawh Marcus Rashford chu khel ṭha mah se chakna goal a khung thei ta bik lo.
Unai Emery naute hian Nilaini zanah Liverpool an mikhual zui leh nghal dawn - champion tum Reds aiin hahchawlhna hun ni khatin an nei tam dawn zawk tihna a ni.