Arteta-a Arsenal = Chak Lo

Arsene Wenger hnawltu Arsenal ke chheh a rem thei lo, ke an rap rem thei lo a ni satliah lo - Mikel Arteta kaihhruaina hnuaiah a chhe zawngin record an siam chho mek. Inrinni zan khan Everton lakah 2-1 in an tlawm a, table mawng lamah an talbuai.

Inrinni zan Premier League inkhel a zawh rualin engtikah nge Arteta an ban ang tih zawhna a awm. Match zawna Chelsea, Leicester leh Arsenal hneh thei Carlo Ancelotti naute hian season tharah Champions League an khel ang em, tih zawhna nen a inang lo viau.

Pierre-Emerick Aubameyang chu chawn hliam vangin a inlan thei lo, tlarhma laia awm Eddie Nketiah chuan Kieran Tierney hnen aṭangin ball duhthusam hmu mah se goal zawnah a pet thei lo, box chhunga dip daltu nei lo chungin goal ban hrulah a pet chhuak.

Arsenal duh loh Alex Iwobi-a ball cross chu Dominic Calvert-Lewin-a'n lo tawk pial zuahin Rob Holding chuan an lamah a tih luh phah a, keeper Bernd Leno tan dan hman a ni lo, German keeper hian a hnuah Calvert-Lewin khung tur chu ṭha zetin a dang thung.

Ainsley Maitland-Niles a tih tluk vangin Tom Davies-a penalty chawi chu Nicolas Pepe-a'n khungin 1-1 a ni a, chawlhlawk hma chiahin vengtu nei lo Yerry Mina chuan corner aṭang ball lo kal a tuah lut a, defender David Luiz tan tih theih a awm lo.

Tawnhriat ngah Willian a thawh hlawk tawk lo a, second half-ah Brazilian winger hian box chhunga a ball vawrh luh chu buai nuaih karah Luiz-a'n goal ban per dawpin a hlap - a vanneih ṭum a ni lo. Goal dang a luh belh loh avangin an mualah Everton an chak.

Nikum thlasik lai kha a ni a, team talbuai Arsenal leh Everton ten manager thar an nei; an hming chu Arteta leh Ancelotti te an ni. Team pahnih hi 2019 December 21 khan Goodison Park-ah an intawng a, manager pahnih hian mipui zing aṭanga en in, 0-0 in an inhnehtawk.

Kum khat a liam a, manager pahnih hi a hmun ngaiah an intawng, tunah chuan khelmual sir aṭangin an naute an kaihruai tawh. Italian manager Ancelotti-a'n a naute chu nasa takin hma a sawnpui tawh, Spanish manager erawhin a hnung tawlhpui thung.

Everton-in league match 14 khelh aṭanga point 26 hmuin pahnihna dinhmun an luah, hmahruaitu Liverpool an phak lohna chu point nga a ni. Nizana Tottenham leh Leicester inkhel result a zirin an dinhmun hi a la danglam thei.

Match 14 aṭanga point 14 hmutu Gunners erawh 15-naah an awm, relegation zone aṭanga an himna chu point li chauh a ni! 1974-75 hnu lama season bul an ṭan chhiat ber ṭum an tawng mek a, an tho chhuak thei ang em tih chu zawhna lian tak a tling.

Premier League nomawi chu Arsenal fan-te titi a ni phak tawh lo a, fans zingah season thara Champions League khelh beisei an la awm a nih pawhin rinna chak a ngai ve khawp ang. A tam zawk chuan 'Kan tla bik em lo ang chu maw?' tih chu an inzawhna a ni mek!

An chet chhiat chhan an zawng a, chhuanlam tur hrang hrang an ngaihtuah. Manager tawnhriat ngah lo Arteta chu dem rawn a ni a, tun dinhmun thlir chuan club thuneitu lamin ban tumna an la nei lo niin a lang. Fans tam tak rilrua awm chu 'Mesut Ozil khel ve ta se' tih a ni.

Germany international hlui Ozil hi goal venhim kawngah a ṭangkai tawk lo a ni mai thei. Mahse, goal khung tur siamsak tur leh khingpuite goal bula ball sem kual tur chuan an player neihsa zingah ani aia ṭha thlan tur an awm lo.

Arteta-a'n tlanghnung rem phui a tum a, a phui thei rih chuang si lo. League match 14 aṭangin goal 12 chauh an khung thei a, anni aia khung tlem chu Burnley (6 goals) leh Sheffield United (7) te chauh an ni, team pahnih hi tla thei dinhmunah an ding mek.

Goal thun khawl ni ṭhin Auba a hriam lo a, khualmuala an inkhelh hnuhnung pangaah 'Open Play' aṭanga goal an khung miah lo hi Wenger kaihhruaina hnuaia 'attacking game' khel ṭhin team tan chuan manganna tham a tling.

Fans lamin midang goal khung tur siamsak thiam hmingthang Ozil hming an lamri mek. Emirates Stadium a inkhel entu an awm zauh lai pawh khan 'Bring Back Ozil' tih thuziak an tarlang nual.

Eng vangin nge player hlawh hnem leh theihna nei sang Ozil hi a inkhelh loh? A khel lo a ni satliah lo a, Premier League leh Europa League squad aṭanga paih a ni. An paih chhan tak hriat a ni lo a, chhan hrang hrang an inrinsiak zinga sawi hlawh chu China vang tih a ni.

Nikum khan Ozil hian China sorkar chu an rama Uighur Muslim ho a enkawl danah a sawisel a, a sakhua ang vuantu Uighur mi ṭhenkhat chu pasalṭha leh mahni sakhua humhim tum tiin a fak zui bawk.

Ozil thu sawi vangin China an lawm lo, an ram thupuangtu chuan Ozil hian thu dik a hriat loh vang niin a sawi. Pro Evolution Soccer 2020 video game aṭangin Ozil an paih a, Arsenal leh Manchester City inkhel tur chu China ramah an tichhuak duh lo nghal bawk a ni.

Arsenal chuan Ozil thu sawi hian club nen inzawmna a neih loh thu an sawi zui a, mimal ngaihdan chauh a ni tiin an sawi bawk. Sumdawnna vangin China leh khawthlang club tam tak an inzawm a, hei vang hian English club pawh hian sum tamna ram hi inrempui a duh.

Arteta-a'n 'Football vang' tiin Ozil inkhelh loh chhan hi sawi tawh mah se mipui rin a hlawh chuang lo. Arsenal squad hi thla leh (January) hian siamṭhat theih a ni dawn, chumi hunah chuan boruak siam ṭhat nan Ozil a ko kir dawn em tih chu hunin a la hril ang.

"Season bul kan ṭan fuh hle a, hun harsa kan tawn det hnuah kan khel ṭha leh ta. Hetianga kawng dik kan zawh thei hi ka lawm hle. Set-piece hmang thiam player kan nei a, goal kan khung theihna kawng a nih bawk avangin kan zir ngun hle, kan hlauhawmna a ni bawk. Table en ila tuna kan dinhmun hi lawmna tur a ni,"

- Carlo Ancelotti, Everton Manager

"Tun hnaia kan hun tawn hi a inang hlawm hle. Inkhel kan thunun a, theihtawp chhuahin inkhel kan thunun, mahse rei lote kan chet sual zeuh kan tuar zel si. Kan chak lo, goal kan chhuah a, ven theih tur kan chhuah leh ṭhin. Vanneihna kan lamah a ṭang lo a, hetiang reng tur chu a ni bik lo," 

- Mikel Arteta,  Arsenal Manager