Napoli an chelh zanah Milan an chak

Serie A hmahruaitu Napoli chu Lazio nen 2-2 in an inhnehtawk, a chunga bera awmin point an hloh ṭhen zanah AC Milan chuan Hellas Verona chu 1-0 a hnehin hma lam an pan ve zel thung a ni.

Tun hnaiah Napoli an chak zo lo zeuh zeuh a, coach Antonio Conte-a'n chak ngei an ngaih thu sawi mah se an hlen chhuak thei rih lo. Inrinni zan Stadio Olimpico-a inkhelah an goal an venghim tluan thei lo.

Lazio forward Gustav Isaksen-a goal khung chu Giacomo Raspadori-a'n sutin Adam Murasic chuan anmahni lamah a ti lut palh bawk, goal nei hnuhnung Naples club lamin 2-1 in hma an hruai let.

Mahse, hun tawp hma deuhin Boulaye Dia chuan box sir lam deuh aṭangin goal kilah mawi zetin a chhuih lut a, si phurh sutin point an hlawh chhuak - season thara Champions League khel phak turin an che fuh zel.

Napoli coach Antonio Conte chuan, "Kan squad a chhah tawk lohzia a lang, bench aṭanga lut hmasa ber Alessandro Buongiorno khel hliam vanga thla hnih leh a chanve chawl, tuna lo kir hlim chauh a la ni.

"Theihtawp chhuahin kan bei a, mahse inkhel ṭhenkhatah hi chuan danglamna thlen hi a harsa ve ṭhin bawk. Kan match hnuhnung hoah a tawp lam kan khar ṭha lo ṭhin hi inenfiah a ngai hle," a ti.

January thla tawp lamah khan Napoli hian Juventus 2-1 in an hneh, a hnuah AS Roma, Udinese leh Lazio te nen an inhnehtawk - an hnuaia awm Inter Milan chuan an khelh tlema an khelh huna hnehna an chan chuan a chung berah an awm ang.

Inrinni zan Serie A inkhel dangah AC Milan chuan Santiago Gimenez-a goal khat hmangin Hellas Verona chu 1-0 in an hneh a, goal awmchhun siamsaktu hi an player ṭha Rafael Leao-a siamsak a ni.

San Siro-a inkhelah goal kan hmu har, minute 75-naah Portugal international Leao chuan keeper rawn tlan chhuak Lorenzo Montip a pet khalh a, ball kang hi Gimenez chuan nuamsa takin a lo tauh lut.

Inkhel banah Milan coach Sergio Conceicao chuan chanchinbu mite a hmachhawn lo. Milan director Zlatan Ibrahimovic chuan, "Inkhelh banah kan coach khan inthlakna hmunah lungngai takin a awm, a chhan chu Pinto da Costa-a thi a sun vang a ni," a ti.

Portuguese sports exicutive Pinto da Costa hi February 15, Inrinni khan a boral a, Milan coach Conceicao-a'n pa anga a en a ni.