Real Madrid tan Mbappe-a goal a tawk lo

La Liga champion lai Real Madrid tan Kylian Mbappe-a'n goal khungin hma hruai mah se, midfielder ṭha Jude Bellingham hnawhchhuah a ni a, mualneitu Osasuna lamin sutin 1-1 in an inhnehtawk.

Player neih dan chhut chuan Inrinni zana Estadio El Sadar-a inkhelah hian Real Madrid hi chak tura ngaih an ni, Federico Valverde-a cross ṭha lutuk chu awmna hmun dika awm Mbappe-a'n chiang lutukin a khung a, tun season league gaol 17 a khungna a ni.

Real Madrid hian hun ṭha an neih an chhawr chhunzawm thei lo a, chawlhlawk hma deuhin Bellingham chu a foul, red card pekna tur niin a lang lo, mahse referee Jose Luis Munuera Montero lakah ṭawngkam mawi lo a hmang zui a, hnawhchhuah a ni.

England international hi kum 2024 March thla khan Valencia nen an inkhelh ṭumin hnawhchhuah a lo ni tawh bawk a, hemi ṭum pawh hian referee a sawisel vangin yellow card pahnihna an pe.

Bellingham chuan, "Referee ten ka thusawi dik tak an hre lo a nih chuan buaina a awm ṭhin, thil thleng kha a nihna ka sawi mai a ni a, mi tham lo leh hnuaichhiah taka sawina ṭawngkam ka hmang lo," a ti.

Inkhelh banah Carlo Ancelotti pawhin Bellingham chuan match official huat tur thu a sawi lo tih a sawi ve bawk. Real Madrid hian Nilaini zanah Champions League playoff khel turin Manchester City an mikhual zui lehnghal ang.