PSG an sang zual zel

Paris Saint-Germain chuan Ligue 1 nomawi an kawl lai humhim turin kawng dik an zawh mek zel - Inrinni zan khan an mikhualna ramah Toulouse chu 1-0 in an hneh.

Stadium de Toulouse-a inkhelah PSG tan Fabian Ruiz chuan minute 52-naah goal awmchhun a khung a, goal dang lut zui loin Luis Enrique leh a nauten point thum hlu tak an hlawh chhuak.

Paris club hian Nilaini zanah Champions League playoff khelh hmabak an la nei, UCL an ngaihpawimawh avangin Ligue 1 lamah hian an player ṭha ṭhenkhat an hawhchawlh tir a ni.

PSG manager Enrique chuan, "Kan tan chuan hnehna pawimawh leh hlu tak a ni. Match tin maiah hian hnehna chan châkin kan tuihal chho zel, chu chuan rah ṭha tak a chhuah tih pawh kan hmu.

"Ka naute hian fak an phu, kar khatah match pakhat aia tam kan khel chung pawhin phur leh thatho takin an inkhel thei reng," a ti a, tun hnaia an kaltluanna chu Champions League lamah pawh chhawm ngei a duh tih a sawi bawk.

PSG hian Ligue 1 match 22 an khelh aṭanga point 56 hmuin table chung berah an awm, anmahni hnaih bertu Marseille aiin khelh zat inangah point 10 zetin an sang zawk a, harsa lutuk loin an nomawi kawl lai chu an humhim leh dawn niin a lang.

Inrinni zan Ligue 1 inkhel dangah AS Monaco chuan Nantes chu 7-1 in an sawp a, point 40 hmuin table-ah pathumna dinhmun an luah - season thara Champions League khel turin an dinhmun an sawhnghet ve zel a ni.