Odisha-in knockout beiseina chhi nung

Indian Super League-ah Mizo tamna Odisha-in Hyderabad 3-1 in an hneh a, knockout round luh beiseina an nei chhunzawm zel. ISL-ah hian team 13 an awm a, a sang parukin knockout an khel dawn. Odisha hian hnehna chang mah se pasarihnaah an awm a, Lallianzuala Chhangte captain-na hnuaia khel Mumbai City aiin match khata khel tam chungin point hnihin an pha lo.

Kalinga Stadium-ah Spanish coach Sergio Lobera-a'n Mizo player pathum Jerry Mawihmingthanga, Isak Vanlalruatfela leh Lalṭhathanga Khawlhring te bul a ṭantir a, bench-ah Jerry Lalrinzuala a awm thung. Hyderabad lamah Isaac Vanmalsawma leh Ramhlunchhunga te awmin mikhual team hian Stefan Sapic hmangin minute 30-naah an khung hmasa a, first half-ah 1-0 a ni.

Second half-ah Odisha an rawn che ṭha a; Mourtada Fall, Hugo Boumous leh Rahim Ali te hmangin an chhanglet a, 3-1 in an chak. Boumous-a goal khung hi Jerry Mawihmingthanga siamsak a ni. Inkhel dangah Chennaiyin-in Punjab 2-1 in an hneh a, Mohun Bagan-in Kerala Blasters 3-0 in an sawp bawk.

ISL-ah hian a sang pahnihin semifinal an lut nghal a, pathumna aṭanga paruknain semifinal khel tur zawnna knockout playoff an khel thung. Palina leh pangana an inhmachhawn a, heta chak zawk hian semifinal-ah table-a pakhatna an hmachhawn. Pathumna leh paruknain knokcout playoff match pakhat zawk an khel a, heta chak zawk hian table-a pahnihna nen semifinal an khel leh bawk. Semifinal hi double leg-a khelh a ni.