Chelsea mikhual tur West Ham

21st December, 2020

Zan dar 1:30 hian Chelsea-in Stamford Bridge-ah West Ham an mikhual dawn. Burnley-in zanin dar 11:00 hian Wolverhampton Wanderers an hmachhawn bawk ang.

Frank Lampard-a hoten nipui bazarah pound maktaduai 200 chuang an hmang a, season bul pawh ṭan chhe lo mah se tun hnaiah an che chhia. Blues hian match hnuhnung pahnihah Everton leh Wolves an hneh lo a, table-ah pawh pariatnaah an tla thla tawh.

Kum 42 mi Lampard chuan, "West Ham nena kan inkhel tur hi a pawimawh hle. Player tan fiahna a ni a, player thlangtu ka nih avangin ka tan pawh fiahna a ni. Leeds nena kan inkhelh ṭum te khan kan khel ṭha a, amaherawhchu Everton leh Wolves kan khelh ṭumin kan tla hniam," tiin tun hnaiah an khel ṭha tawk lo tih a pawm.

Blues boss chuan sawi chhunzawmin, "Football-ah chuan chak taka tlan leh chak duhna rilru put a pawimawh. Tun hnaiah 15-20% in kan tlahniam a, chuvangin inrintawkna kan neih let a ṭul. Nikum aiin table chung bera awm kan hnaih zawk a, vawi hnih kan chak loh hmaa kan khelh dan kha kan neih let a ṭul," tiin insiamṭhat theih a inbeisei thu a sawi.

Chelsea tan Timo Werner leh Kurt Zouma ten Premier League-ah goal li ve ve an khung tawh a, club top scorer an ni mek. Premier League-a goal khung tam Mohamed Salah (13), Dominic Calvert-Lewin (11), Son Heung-Min (11) leh Jamie Vardy (10) ten goal 10 an khung tling tawh a, Blues forward Werner hi khung tam lamah 17-na a ni pha chauh. Blues tan zanina point thum hlawh chhuak turin goal khung a pawimawh a, Werner a pawimawh dawn.

Kum 24 mi Werner chuan, "Kan man vang chauh ni loin club thar kan zawm chuan pressure a awm ṭhin. Kum dang aiin pressure a sang a, chutihrualin footballer ṭha chu pressure sangah an che ṭha tur a ni. Premier League hi Bundesliga nen a inang lo a, ka rin aiin a harsa," tiin a sawi.

Pound maktaduai 45 man Werner hian Premier League match 13 aṭangin goal li a khung a, an khingpui tur West Ham hian tun season-ah goal 16 an chhuah tawh. Tlarhnung phui lamah Hammers hi team vantlang an ni a, German forward leh Blues tlarhma tan fiahna a ni ang.