Australia-in India an sawp
India-in Test cricket-a run an siam tlem ber ṭum an tawng a, Australia nen Test match an khelh mek hmasa bera second innings-ah run 36 chauh siamin an thi vek. Adelaide-a Test match khelhah hian Aussies wicket riatin an chak.
Australia leh India hian December 26-30 inkar hian Melbourne Cricket Ground-ah Test match vawi hnihna an khel dawn. Men in Blue captain Virat Kohli hi a nupui Anushka Sharma-i‘n fa a hrinsak dawn avangin Test match khelh mekah hian a inlan tawh dawn lo.
Kohli a che ṭha
December 17 khan inelna hi khelh ṭan a ni a, Virat Kohli-a'n run 74 a siam. India captain hi che ṭha mah se Australia rama khelh a nih miau avangin Aussie bowler te an langsar ta zawk. Mitchell Starc-a‘n run 53 pein wicket li a la a, Pat Cummins-a‘n run 48 pein wicket thum a la bawk. Men in Blue hian run 244 an siam pha tho a, chakpui tham niin lang lo mah se a zahpui-awm loh.
India bowler-ten first innings-ah an tihtur an ti ve zui a, Ravichandran Ashwin (55/4) leh Umesh Yadav (40/3) te an che ṭha a, Jasprit Bumrah-a‘n wicket hnih la ve bawkin Aussie-in run 191 chauh an siam. Aussie captain Tim Paine-a‘n thi loin run 73 a siam a, Marnus Labuschagne-a‘n run 47 siam ve bawkin Aussie batsman-te an che ṭha lo.
An mualpho ta
First innings zawhah India-in chak beiseina an la nei a, amaherawhchu beiseina a thamral hma hle. Indian batsman zinga run 10 vaw tling an awm lo a, captain Virat Kohli pawhin run li chauh a siam.
Second innings-ah hi chuan Australia bowler fak mai loh chu tih theih dang a awm lo. Josh Hazlewood-a'n run riat chauh pein wicket nga a la. Pat Cummins pawh che ṭha lehin run 21 chauh pein wicket li a la ve bawk a, India-in run 36 chauh an siam.
Australia-in chak turin run 90 siam a ngai a, awlsam takin target hi an umpha. Test match hi ni nga khelh tur ni mah se Aussie-in ni thum lekah hnehna an chang.
An tho chhuak dawn
India captain Kohli chuan, "Awlsam takin min vawm hlumah ka ngai lo a, ball ṭha tak tak an vawm a, zahthlaka lak turah ka ngai lo. Kan tho chhuak leh ang tih ka ring. Player-ten inrintawkna an nei let ang a, ram tan pen chhuah a ṭul tih an hriat ngei ka beisei," tiin a kalsan tur a teammate-te chungah rinna a nghah thu a sawi.
Second Test-ah hian Kohli bakah bowler Mohammed Shami chu inhliam vangin a khel thei dawn lo. Batsman ṭha mi Rohit Sharma a la tel hman hmel loh a, pace bowler Ishant Sharma an koh tel loh bawk avangin hmabak a harsa dawn hle.
Innings khata run siam tlemte
Total Team Opponent Year
26 New Zealand England 1955
30 South Africa England 1896
30 South Africa England 1924
35 South Africa England 1899
36 South Africa Australia 1932
36 Australia England 1902
36 India Australia 2020