Bethlehem VT-in Zo United an hneh nghal

Mizoram Premier League Season 5 match hmasa ber a hmuhnawm nghal - Bethlehem Vengthlang FC-in minute 69-naa PC Zosanga goal hmangin Zo United FC 1-0 in an hneh.

Ningani zana Lammuala inkhel hi ruah-sur vangin inkhel entu an ṭha--hnem tawk lo a, thawm erawh a ring hle - team pahnih khuang nen an thawk chhuak. Lalbiaksanga Colney (BS-a) hnuaiah BVT-in hnehna an chang nghal a, Lammualah jersey eng ha an pung chho ngei ang.

Game rang

Rin lawk ang ngeiin MPL5 game hmasa ber a rang nghal a, tlar hma erawh a la hriam tawk lo. Zo United winger Van-lalhmangaiha leh forward Jesse Laldinpuia-te tlan chakna chu BVT tlar hnung tan buai-na tham a tling. Electric Veng tlang--val Hmangaiha ball pet ṭha tak chu BVT keeper Mal-sawm-dawngzela'n a dang ṭha hle.

Hun chanve hmalamah Zo United game nung zawk mah se goal hmaah BVT an hlauhawm zawk a, keeper MC Lalneihsanga'n hmun himah corner ṭanga ball kal chu a nem chhuah theih loh avangin PC Zosanga-a'n chance ṭha nei mah se Zo United captain R. Lathantluanga'n crossbar a tauh per hman hlauh.

Zo United-in second half-ah counter attack hmangin goal khung theihna tur an nei a, Jesse-a'n ball lalut ṭha mah se Isak Vanlalpeka'n BVT defender Lalhlimpuia a paltlang zawh loh avangin engmah loah a chhuak.

Winger Lalrammawia'n BVT tana MPL match hmasa berah hming a chher thei lo a, R. Lalrinsanga luh hnuah BS-a hote inkhel a nung lehzual. Minute 69-naa yard 30 vel
aṭanga Hmingthanmawia'n ṭha zela ball petin crossbar a per a, a per lêt leh hi PC Zosanga'n a tauh lut.

Hun tawp lamah BVT-in goal khung belh theihna tur hun
ṭha an hlah nasa a, PC Zosanga'n goal hnihna a khung theih loh bakah substitute Risanga leh midfielder khel ṭha Zosangkima ten an khung thei lo.

Kan tho ang - Rova

Zo United coach Vanlalrova chuan, "BVT an ṭha tih kan hria a, mah se anni aia ṭha zawka kan inhriat avangin kan player-te khan an zuam sual a ni. Inkhelh ṭan tirh lamah an fimkhur loa, a hnua ṭan vak an tum khan an insiamṭha thei tawh lo a ni. Point thum kan hmuh theihna tura kan ngaihah point kan hmuh loh avangin ka lungawi lo hle," tiin Vanglaini palai a hrilh.

Zo United hian Chanmari West ṭanga an striker lakluh Lalnun-sanga (Talea) chu inhliam vangin an la chhawr thei lo a, chuti chung chuan Rova chuan Chhinga Veng an hmachhawn hunah chuan an thochhuah ngei tur thu a sawi.

Hmasawnna tur a la awm - BS-a

BVT coach BS-a chuan, "First half-ah kan buai a, second half-a kan khelh danah erawh ka lungawi. Chutihrualin kan ṭhat dan ber a la ni lo a, hmasawnna tur kan la nghah hle. Player-te thawhrah zarah point thum kan hmu a, an chungah ka lawm takzet a ni," tiin a naute a fak.

BVT hian Sep-tem-ber 9 zan hian Chanmari West an hmachhawn leh dawn a, Zirtawpni zanah veng lian pahnih inkhelh hunah BVT-in ṭantu an neih tam tawh beisei a ni.

Ngaihnawm

• MPL5-a goal khung hmasa bertu chu New Builum tlangval PC Zosanga a ni

• Yellow card hmu hmasa ber BVT defender PC Laldinpuia

• BVT-in MPL an khelh hmasak ber ṭuma Chanmari FC an hneh loh hnuah Mizoram Police (2-1) leh Zo United (1-0) an hneh.

• Zo United-in MPL4 ṭantirha Dinthar FC an hneh chiah kha MPL season nga chhunga match hmasa ber an chak awmchhun a ni.