Danny Blind-a hmabak a thim

Euro 2016 khel phak lo ram pahnih Netherlands leh Greece ten Ningani zan khan friendly match an khel a, ram pahnih inkhelh tawhna chanchina a vawi khat nan Greece chuan hnehna changin Dutch hi 2-1 in an tlawm.

Netherlands coach Dan-ny Blind-a'n Euro an khelh phak loh hnuah 2018 Russi FIFA World Cup an beisei thu a sawi a, qualifier an khelh ṭan dawna an inbuatsaihna hnuhnung berah an chak loh leh tak avangin a boruak a rit hle ang. Football thiam ram tia sawi ṭhin Netherlands hi Euro-ah an inlan phak loh tawh hnuah result ṭha an neih chhunzawm loh avang hian manager Blind hmabak a hautak chho dawn hle tihna a ni.

Philips Stadion-a inkhelah mikhual tan Georginio Wijnaldum chuan goal hmahruai khung mah se Greece lam hian Giannis Gianniotas leh Kostas Mitroglou te goal hmanga an chhan let avangin an khelmualah hian a zawnin match li chhung hneh loh an tawng ta lo.

Blind hian captain Arjen Rob-ben chu hliam vangin a chhawr thei lo a, senior player Nigel de Jong leh Robin van Persie te pawh thla 12 chhung zet koh an ni tawh lo. Veteran midfielder Wes-ley Sneijder chu bench aṭanga tlan luhtir niin Dutch team kum chawlhrual hi kum 25 a ni.

Blind chuan, "Kan tum ber chu result ṭha neih leh World Cup khelh a ni a, hei hi tunah pawh a la danglam lo. A pawimawh hmasa chu Sweden nen kan inkhelh huna result
ṭha neih a ni a, vawiin a-
ṭang hian kan thawk ṭan nghal ang," tiin a sawi.

Inkhel chungchang sawi chhunzawmin, "Greece khan kan lamah ball an rawn kal pui meuh lo a, chhiar tham lek a ni ang. Mahse, kan tihsual apiangin min hrem nghal zel thung - inzirna tur kan la ngah hle tih a lang," a ti.

Netherlands hi 2018 World Cup qualifying khel turin September 6 hian Sweden-ah an zin chhuak ang a, Goup A-ah France, Sweden, Bulgaria, Belarus leh Luxembourg te nen an inel dawn a ni.