Portugal tan Nani a vul

Nani chuan goal hnih khungin Portugal chu Gibraltar lakah 5-0 in hnehna a chanpui. Ningani zan inkhelah hian Pepe, Joao Cancelo leh Bernardo Silva ten goal khat
ṭheuh an khung ve bawk.

Euro 2016 champion Portugal tan hian captain Cristiano Ronaldo chu khup na vangin a la inlan thei lo a, Euro best young player Renato Sanches pawh duhthusama a la dam loh avangin squad aṭangin a inhnukdawk.

Ronaldo awm loh vanga cap-tain armband hrengtu Nani-a'n a mawhphurhna a hlen ṭha a, Euro final-a chakna goal khungtu Eder thawhrah sengin Nani hian minute 27-naah goal hmahruai khungin second half ṭan tirhah an goal hnihna a khung bawk a, nuamsa takin goal thum dang an khung belh bawk.

Manchester United winger hlui Nani chuan, "Kan khelh dan kha a lungawi thlak hle, hei erawh kan hriat a ṭul - kan inkhelh leh tur hi World Cup qualifier a ni tawh a, kan khingui tur Switzerland hi team inringtawk tak an nih avangin a hautak hle ang," a ti.

Nani chuan sawi chhunzawmin, "Cristiano Ronaldo leh Renato Sanches te hi player ṭha leh ṭangkai an ni a, vanduai thlak takin kan zingah an tel thei rih lo thung. Tuna pawimawh chu anni pahnih tel loa hnehna chan dan hriat hi a ni. Kan team zingah hian mamawh huna
ṭangkai thei an awm nual avangin a thlamuanthlak hle," tiin an star player pahnih tel lo pawha beiseina an neih thu a sawi tel bawk.

Portugal hian 2018 FIFA World Cup qualifier an khelh chhunzawm dawn a, September 6 hian an match hmasa ber atan Switzerland an hmachhawn ang. Russia World Cup-a inlan tum hian Group B-ah Swiss, Hungary, Faroe Islands, Latvia leh Andorra te nen an inel dawn a ni.