Argentina tan goal nen Messi a kir
Lionel Messi-a'n Argentina tan inkhelh a tum tawh loh thu a sawi aṭanga thla hnih a liam hnuah ram tan koh leh a ni a, ram tana goal khung hnem ber hian a lo kir lehna inkhelah goal khat khungin Uruguay lakah 1-0 in a ram chu hnehna a chanpui. Inkhel dangah Brazil an chak chiang a, hetihlai hian Chile erawh an buai chhunzawm zel.
Ningani zan khan Argentina hian 2018 FIFA World Cup qualifier-a an match sarih nan Uruguay an hmachhawn a, he inkhela goal awmchhun hi minute 43-naa Messi khung a ni. Barcelona thiampuipa hian Javier Mascherano hnen aṭanga a ball hmuh chu goal lamah tlanpuiin defender intlar ho inrin loh karah a pet thut a - a goal chiang hle.
Uruguay tan hian Barca lama Messi-a teammate striker Luis Suarez chuan freekick aṭangin goal khung teuh hle mah se Argentina keeper Sergio Romero-a'n a dan sak a, minute 52-naa Messi freekick pawh Uru-guay keeper Fernando Muslera-a'n a dan sak ve bawk.
Argentina hian match sarih an khelh aṭangin point 14 an hmu ta a, ram 10 inel zingah hmahruaitu niin pahnihna Uruguay nena an inthlauhna erawh point khat chiah a ni - September 6 khian Venezuela an hmachhawn leh ang.
Argentina captain Messi chuan, "Ram tana ka inkhel chhunzawm thei hi ka lawm a, ka chawlh tur thu ka sawi kha mi ka bum tumna a ni lo. Coach nen kan inbia a, mipui lam aṭangin thawm a awm bawk, tunah chuan a hma aia ṭha zawka khel turin kan inbuatsaih chho a ni," tiin a sawi.
Kum 29-a upa Messi hian Copa America final-a Chile an hneh loh hnuah ram tana inkhelh a chawlhsan thu a sawi a, he thu hian Chile champion aiin sawi zui a hlawh! Messi leh a team-te hi kum thum chhungin major tournament final pathumah a chak lo lamah an ṭang a ni.
Brazil chak chiang
Coach thar Tite kaihhruaina hnuaiah Brazil thar kan hmu a, inelna pawimawh an hma-chhawnna hmasa berah captain Neymar-a penalty chhuih luh leh rawlthar duhawm Gabriel Jesus-a goal hnih khung hmangin khualmualah Ecuador chu nuamsa takin 3-0 in an hneh.
Kum 24-a upa Neymar hian Brazil tan match 71 a khelh
aṭangin goal 47 a khung tawh a, legend Zico chu goal khat chiahin an tluk lo tawh - an ram chanchinah goal khung tam lamah pangana a ni mek tihna a ni.
Brazil coach Tite chuan, "Ney-mar hi Santos aṭanga inzir chhuak niin inkhelh chauh ni loin hruaitu ṭha nihna a zir chhuak tel a, inelna thiamhlim hmachhawn dan a thiamin a rilru put hmang a dik em em bawk. Tun ṭumah hian ka player-ten an khelṭha em em a, Neymar bakah goal hnih khungtu Jesus te khan an khel ṭha zual," tiin goal khungtu pahnih a fak hle.
Brazil hian point 12 an hmu tawh a, hmahruaitu Argentina nen an inthlauhna chu point hnih chiah niin October 6 khian Bolivia an hmachhawn leh dawn a ni.
Chile an buai
Chile hi 2015 Copa America thlengtu an ni a, an ram chan-china a vawi khat nan major tour-namnet-ah an champion. Kuminah Copa America hi a kum 100-na niin United States-ah Copa America Centenario khelh a ni a, an champion zui leh bawk. South America ram huaisen hi 2018 FIFA World Cup qualifier-ah erawh beisei an phak lo chhunzawm zel a, khualmualah Paraguay lakah 2-1 in an tlawm.
Chile hian koalkeeper leh captain ni bawk Claudio Bravo chu chhungkaw buaina vangin an chhawr thei lo a, midfielder Arturo Vidal, Alexis Sanchez leh Eduardo Vargas te an la neih avangin team ṭha an la ni tho. Paraguay tan hian midfielder Oscar Romero leh centre-back Paulo da Silva te khung a ni a, Chile goal neihchhun hi Bayern Munich midfielder Vidal khung a ni thung.
Chile hian match sarih an khelh tawh aṭangin point 10 chauh an la hlawh chhuak a, table-ah pasarihna niin an hnuaiah ram pathum Bolivia, Peru leh Venezuela te chiah an awm - Russia pan tur chuan an insiamṭhat thuai a ṭul ang.