Chhinga Veng - Nuam Nuam Nuam

Chhinga Veng FC-in Mizoram Premier League-a an match hmasa berah Chanmari West FC 2-0 in an hneh. Chhingcows-in an au hla thulkhung 'Chhinga Veng - Nuam Nuam Nuam' tih chu phur takin a vawi khat nan Lammualah an sa rual.

Nimin tlai inkhelah hian Chhinga Veng forward Lalkhaw-puimawia'n (Mapuia) goal hnih a khung a, Kelkang tlangval hi man of the match-a thlan a ni.

Harhna thlentu Kelkang tlangval

Chanmari West FC-in inkhel bul ṭan ṭha mah se Chhinga Vengin goal hlauhawm an ngah zawk a, West Warrior midfielder Lalmuansanga kutin ball a fuh vang leh box chhunga Mapuia tihtluk vangin penalty shout ṭum hnih an nei a, pek an ni lo ve ve.

Minute 29-naah dinglam aṭanga right back thar Din-thangpuia cross chu Chhinga Veng striker Mapuia'n a tauh goal a, boruakah Kelkang tlangval a zuang sang fal hle.

West Warrior lamin corner kick hmang ṭangkaiin goal khat an chhangletah an inngai a, amaherawhchu boruakah ball-in goal line a pelh hman avangin pawm a ni lo. Chhinga Veng keeper R. Lalhmangaihzuala tawnhriat neih tam tawk lohna a lang a, Chanmari West-in H. Lallianzama aia lut R. Lalnuntluanga hmangin an si phurh an sut teuh hle.

Second half-ah West Warrior defender Toky Zomuanpuia ball tauh chu Chhinga Veng crossbar chungah chiah a kal a, MPL kai thar left back Lalramfelpuia ball pet chu kawh zet chu goal pawnah chiah a kal bawk.

Chhinga Veng winger Lal--ramliana a thawk rim a, Sih-phir tlangval ball vawrh ṭha tak chu Vanlallawma'n engmah loah a chhuah a, MS Dawngliana inhliam vanga lut Khawzawl forward Lawma'n MPL a khelhna hmasa berah sulhnu duhawm a hnutchhiah lo.

Minute 68-naah Kelkang tlangval bawk a inlar a, Chhinga Veng winger H. Lalmuankima ball pet chu Chanmari West keeper Lalruatpuia'n dang mah se awmna hmun tur taka awm Mapuia'n a pet goal chiang hle - Mapuia goal bawh a na takzet.

Hun tawp lamah West Warrior-in an si phurh sut tumin K. Lalnunzama, Lianzama leh Ramengmawia-te luhtir mah se captain R. Laldampuia freekick bak Chhinga Veng ṭantute tana thinphu tirang thei a awm lo.

Kan khelchhia - Zara

Chanmari West coach HC Zarzoliana chuan, "A tir lamah khel- ṭha mah ila pressure kan insiam chawp avangin kan hman-hmawh a, kan khel ṭha lo. Kan khelh danah lungawina tur a awm lo a, kan theihna angin kan khel phak lo nasa a ni," tiin an khelh dana a lungawi loh thu a sawi.

Kan hun a thleng - RT-a

Chhinga Veng coach Lal-remtluanga chuan, "Kan hun a thleng ve ta, kan ṭha ta viau tihna lam erawh a ni lo. Kan player an dam kim chho a, awmze neiin kan player-te kan rem ve thei tawh. MPL ṭan hmaa chak kan neih loh avangin player-ten chak châkna tak tak an nei a, kan rilru put hmang a dik tawh avangin hnehna kan changah ka ngai," tiin Vanglaini palai a hrilh.

Dinthar coach hlui RT-a chuan, "Hneh-na kan chan avangin referee thutluknaah
ṭawngkam nâ hman ka tum lo, chutihrualin an thutlukna chu dik se goal tam zawk khung thei tur kan ni. Chak lo ila kan lungawi lo khawp ang," tiin penalty tura ngaih an pek loh vanga a lawm loh thu a sawi.

Ngaihnawm

• Chhinga Veng FC-in MPL match hmasa berah hnehna an chang nghal. Coach Lalremtluanga hnuaia an chakna hmasa ber a ni.

• Chhinga Vengin MPL hmain match nga an khel a, chak an nei lo.

• Chanmari West FC-in season liam ta khan match hmasa berah champion lai Aizawl FC an hneh lo a, MPL5-ah kaithar Chhinga Veng an hneh lo.

• West Warrior-in MPL an khelh hmasak berah Chanmari FC an draw a, MPL3 match hmasa berah Dinthar FC an hneh thung.

• Chhinga Veng leh Chanmari West FC coach Remtluanga leh HC Zarzoliana te hian Dinthar FC-ah MPL coaching career an ṭan ve ve.

• Kelkang tlangval Khawpuimawia chu MPL5-a goal hnih khung thei hmasa ber a ni.

Tute nge inlan?

Chhinga Veng (4-4-2) : R. Lalhmangaihzuala; Dinthangpuia, R. Ladinliana, Vanlalthanga, Lalramfelpuia (Ronald Zothanzama 85'); Lalramliana Varte (Paul Ramfangzaua 81'), Lalchhanchhuaha, Joseph Lalnunpuia, H. Lalmuankima; Lalkhawpuimawia, Vanlallawma (Lalsawmzela 90+3').

Chanmari West (4-1-4-1) : Lalruatpuia; Racy K. Lalremmawia, R. Lalawmpuia, Toky Zomuanpuia, Vanlalzuia Hnamte, Lalmuansanga, R. Laldanmawia, Lalbiakhlua (K. Lalnunzama 73'), Lalmuanzuala (Ramengmawia 77'), Laldampuia; R. Lalnuntuanga (H. Lallianzama 73').