US Open Del Potro leh Murray chak zel

Juan Martin del Potro-a'n sulhnu ṭha a neih tawhna hmunah hnehna a chan chhunzawm zel a, seeded pahniha Andy Murray leh Stan Wawrinka te pawhin US Open third round an lut ve bawk.

Nimin zing khan Del Potro chu kum 2009 final-a Roger Federer a hnehna Arthur Ashe Stadium-ah kum sarih hnuah a kir leh a, khawtual tlangval Steve Johnson chu 7-6(5), 6-3, 6-2 in a hneh.

ATP ranking-a 100-na hnuai lam a nih vanga wildcard an pek Del Potro chuan, "Kum 2009-a ka khelh anga ṭha khan khelh leh ka tum a, ka kum a upat deuh tawh avangin a harsa deuh tawh a ni mai thei - mahse a sang thei ang ber thlen ka tum," tiin a sawi.

Argentine tlangval hi kum thum liam taa Wim-bledon semifinal a khelh hnuah a sang pali zingah a la tel leh lo. Last 16 lut tur chuan David Ferrer a paltlang leh phawt a ngai ang - Ferrer hian second round-ah 6-0, 4-6, 5-7, 6-1, 6-4 in Fabio Fognini a hneh ve bawk a ni.

Inkhel dangah Wim-bledon leh Rio Olympic champion Murray chuan Spain tlangval Marcel Granollers lakah harsatna a tawk lo a, darkar hnih leh minute 22 chhungin 6-4, 6-1, 6-4 a hnehna changin second round a paltlang.

Kum 29-a upa Murray chuan, "Point kan en chuan inkhel awlsam tak angin a lang a ni mai thei. Mita hmutu tan erawh point khat chauh pawh hmu tura thawhrim a ngaih zia a hriat," a ti. Braitain tlangval hian ruah sur hnuaiah pawh Arthur Ashe Stadium-ah khaihlak nei loa an in-khelh theih tak avanga a lawmthu a sawi tel bawk.

Stan nge nge

Grand Slam vawi hnih champion tawh Stan Waw-rinka pawhin third round lut turin inkhel hautak a la hmachhawn lo. Swiss thiampuipa hian Italian Alessandro Giannessi chu 6-1, 7-6(4), 7-5 in a hneh.

Set hnihna an khelh laiin Wawrinka hi 5-2 in a hniam zawkah ṭang mah se a khingpui a pawt tla leh thei a, set hnuhnung berah harsatna a tawk zui lo. Kum 31-a upa Wawrinka hi tun ṭumah hian seeded pathumna niin champion thei player te zinga mi a ni.

Inkhel dangah Japan tlangval Kei Nishikori chuan Karen Khachanov chu 6-4, 4-6, 6-4, 6-3 in a hneh a, seeded pariatna Dominic Thiem pawhin Ricardas Berankis lakah 6-4, 6-3, 6-2 in hnehna a chang ve bawk.