Air Force tihnghin zawh loh AFC

Durand Cup khelh mekah Aizawl FC chu match hnihah vawi hnih an chak ta - Mizoram aṭanga I League khel hmasa ber club hian nimin khan player 10 ni chungin Indian Air Force chu 1-0 in an hneh.

Ambedkar Stadium, Delhi-a inkhelah Aizawl FC tan Bright Middleton Mends chu mamawh chhanna a ni a, Ghanaian striker hian first half-ah he inkhela goal awm chhun hi khungin match hnih chhungin goal vawi thum a khung ta.

Aizawl FC left back Ricky Lallawmawma chu second half-ah hnawhchhuah ni mah se, Durtlang tlangval tel loin Mizo club an ṭang tluan thei a, point thum hlu tak an hlawh chhuak.

India rama football tournament upa ber Durand Cup-ah hian India ram hmun hrang hrang aṭanga sawm bik club 12-in nomawi an inchuh a, champion-in nuai 50 an dawnna tur tournament-ah hian team 12 hi group hniha ṭhen niin an inkhelh kual vek hnuah group table chung lama club pahnih ve vein semifinal an lut dawn a ni.