United squad-ah Schweinsteiger a kir

Jose Mourinho-a'n Old Trafford-ah a inkhelh leh a beisei tawh loh thu a hrilh hnuah Bastian Schweinsteiger chu Ningani khan Premier League khel tura Manchester United-in player 25 an tarlan zingah telh leh a ni!

United manager Mourinho chuan midfield laia khel turin player pahnih a mahmawh thu leh Paul Pogba, Marouane Fellaini, Morgan Schneiderlin, Ander Herrera leh Michael Carrick te a neih avangin Basti tan hmun a awm loh thu a lo sawi tawh.

Germany international hlui hi Under 23 zingah training neihtir niin mi
ṭhenkhat chuan United-in an player senior an enkawl dan hi an lo sawisel hial tawh nghe nghe.

Kum 32-a upa Schweinsteiger hian Nilai zana German tana a match hnuhnung ber a khelh ṭum khan United chhuhsan a tum loh thu leh club-in an mamawh a nih chuan inkhel tura a inpeih thu a lo sawi tawh a, kum 2018 thleng contract a neih chu hman zawh a duh thu a lo sawi tawh - tunah chuan a duhthusam a thleng dik leh dawn ta tihna a ni ang.