Puerto Rico hmaah India
Kum 61 hnua a vawi khat nan Mumbai-in international match a thleng dawn a, zanin dar 8:00 hian India leh Puerto Rico an inhmachhawn ang. Star Sports 2 chuan inkhel hi live-in a pe chhuak dawn a ni.
India squad-ah dan pangngaiin Mizo tlangval Jeje Lalpekhlua a awm a, Shillong Lajong rawlthar duhawm Isaac Vanmalsawma'n India tana a match hmasa ber Bhutan laka a khelh hnuin koh nawn a ni - David Lalrinmuana leh Lallianzuala Chhangte erawh koh nawn an ni lo thung.
Bhutan leh India inkhel kha official match a nih loh avangin Hnahthial rawlthar Isaac hi a inlan a nih chuan India tana offi-cial match hmasa ber a khelhna tur a ni dawn a ni.
Tute nge Puerto Rico?
FIFA ranking-a 114-na ni mek Puerto Rico hi The Con-federation of North, Central Ameri-ca and Cari-b-bean Asso-cia-tion Football (CON-CACAF) hnuaia awm niin an khaw-mualpui ranking-ah 14-na an ni.
Puerto Rico tan vawi 30 in-lana goal 17 khung thei Hector Ramos leh North American Soccer League club Puerto Rico FC midfielder Joseph Marrerote chuan an ram football hruaitute nen an inhmuhthiam loh avangin India kal loh an thlang zawk a, India tan chanchin lawmawm a ni.
Mumbai Football Arena-a inkhel tur Puerto Rico hian India an pan hma an match hnuhnung pahnihah Dominican Republic an hneh lo a, India-a rawn zin zingah coach Carlos Garcia Cantarero a tel lo - Atletico Madrid coach hlui rawn kal loh chhan hi hriat a ni lo thung.
Jeje a phûr
India-in FIFA ranking-ah 152-na ni mekin Puerto Rico nena an inthlauhna chu 38 lai a ni a, he ti chung hian Mizo tlangval Jeje erawh a zam phah lo.
Hnahthial tlangval chuan, "Puerto Rico hi team ṭha tak an ni a, an player-te pawh Europe-a khel deuh vek an nih avangin hmachhawn an hautak dawn tih chu hriat sa a ni. Mahse, kan khelmuala khel tur kan ni a, hnehna kan chan theih ngei kan inbeisei a ni," tiin Vanglaini palai a hrilh.
English manager Stephen Constantine-a'n India coach a nih hnuah squad a thlak danglam nasa ṭhin a, khel ho ṭhang lo player an khelh nasat avangin an buai ṭhin nia sawi a ni. Mahse, Hnahthial tlangval Jeje erawh chuan an coach thutlukna chu team tan a ṭhat zawk thu a sawi.
Indian footballer of the year Jeje chuan, "Coach-in a tir lama squad a thlak nasat lai kha chuan a hautak deuh a, player thar an awm reng avangin khelh dan inman a harsa ṭhin hle. Mahse, tunah erawh player tu pawhin India tan khelhna chance sang tak an nei a ni tih an hria a, tun hma zawng ai khan inelna a sang lehzual. Hei hian India team-ah rah ṭha tak a chhuah a ni," tiin Vanglaini palai hnenah a sawi.