Mizoram Premier League Kai tharin champion hmasa ber an hneh

Zirtawpni zan Lammual inkhelah Ramhlun North FC-in Mizoram Premier League-a champion hmasa ber Dinthar FC chu 1-0 in an hneh a, MPL kaithar tana goal awmchhun khungtu Zosangliana (Chhaia) chu man of the match-a thlan a ni.

MPL5 round hmasa berah champion lai Aizawl FC chu Durand Cup an khelh avangin an inlan ve lo a, Chanmari FC nena an inkhelh tur chu sawn a ni.

Chhinga Veng FC, Bethlehem Vengthlang FC leh Ramhlun North ten an match hmasa berah hneh-na an chang vek a, I Day Foot-ball leh MFA Super Cup-a mualpho Chhinga Veng chu goal difference hmangin hmahruaitu an ni.

Khelṭhate tan

Ramhlun North coach Lal-ruat-liana Sailo-in I Day Football-a Dinthar FC lama goal khungtu MC Malsawmzuala aiah MPL-a tawnhriat la nei lo Lalchhanchhuaha Fanai a ring zawk a, MPL-a sulhnu nei ṭha B. Malsawmzuala chu bench-ah ṭhuttir a ni bawk.

Inkhelh banah hemi chung---changa Vanglaini palai zawhna chhangin Tawia chuan, "Inen-chhinna atana player thlak kual ka ni lo. Kei chuan practice-naa khel ṭhate tan khelhna hmun ka siamsak ṭhin. Kan team hi player pakhatah kan innghat lo a, khelmual chhungah team anga khel theih hi kan tum a ni," a ti.

Ramhlun North hian MFA Super Cup-ah player pawimawh Vanlalthlamuana chu inthununa lekkawh an duh avangin squad-ah an tel tawh lo a, MPL match hmasa berah erawh bul ṭantir a ni leh tawh thung.

Loan player

MPL club hian transfer hun inhawn loh laiin loan player pali (tualchhung pahnih leh state pawn pahnih) an lalut thei a, Dinthar FC hian MPL ṭan hma hauhin tualchhung quota an hmang zo der tawh.

Ramhlun North an hma-chhawn ṭumin Dinthar FC-in Hnahlan aṭanga an lak Lal-ram-engmawia leh Kolasib Project Veng aṭanga an lak Lalhma-chhuana (Achhuana) te chu inkhel bul ṭantu zingah telh an ni lo.

Incho tawk

Goal khung tumin an khel ve ve a, minute 90 chhunga goal khat chiah a lut hi a mak hial zawk.

Ramhlun North midfielder Chhaia freekick pet chu Thla-muana'n goal-ah khung mah se offside vangin pawm a ni lo. MPL kai thar left back Lalmuanawma a talbuai a, Dinthar winger tlan chak Lalruatpuia'n harsatna a siam ngun hle.

Minute 16-na leka Samuel Laltlanthanga freekick pet chu Michael Lalremruata'n goal-ah a chantir a, Aizawl FC striker hlui hian field chanve aia thui tlanin Dinthar FC ṭantu awmna lamah a goal khung a lawm. Amaherawhchu referee-in Dinthar goal khung hi foul a awm nia a hriat avangin a pawmsak lo.

An innawr tawn zak zak hnuah minute 27-naah goal mawi bik a lut a, dinglam aṭanga Jerry F. Zonunsanga cross chu Vanlalthlamuana'n lo dummy (khawifuh lo) zeuhin Chhaia'n pet rem nghal turin a la thla a, I Day Football best player hian goal kilah tak a push goal.

Dinthar FC-in sut tum mah se Vanneihtluanga ball pet keeper David Lalrinpuia zawnah tak a kal a, Lalbiaknia'n shot-in crossbar chung lam a per bawk. Ramhlun North forward Thlamuana'n crossbar a pet per bawk a, inkhel hmuhnawm tak a ni.

Second half la hmuhnawm viau mah se first half lama goal chance a tam avangin a tlahniam tih loh theih a ni lo. Dinthar FC forward Lalruatpuia'n chu minute 14 la awm tihin yellow card vawi hnihna a hmuh avangin hnawhchhuah a ni a, goal hmaa player tam zawk Ramhlun North an hlauhawm zawk bawk.

Chutihrualin hun tawp hma-in Dinthar FC-in nalh takin Ramhlun North tlar hnung an ṭhiat a, captain Samuel-a tun hma anga a tlan chak tawh loh avangin a hmawr an bawk fuh lo.

Eng nge an sawi?

Ramhlun North coach Lal-ruat-liana Sailo chuan, "Tawn-hriat nei ṭha player Samuel-a leh Michael-a te goal hmaa hlauh-awm lo turin kan defender-te'n an dahṭha thei a, pressure sangah ka player-te an rintlak zia ka hmuhin ka lawm hle a ni. Match hmasa ber chak a lawmawm a, bul kan ṭan chauh tih kan hriat a ṭha," tiin a sawi.

Dinthar FC coach Lalrin-tluanga (Saitea) chuan, "Senior player tlem azawng kawl mah ila kan player tam zawk hi player naupang an ni. MPL-ah khatiang khawpa ṭhaa an khel thei kha ka chhuang a, point hmu turin kan insiamṭhat thuai ka beisei," tiin a chak zo lo mah se a naute a fak.

Goal pawm loh leh red card chungchang sawiin Saitea chuan, "Goal ngei turah ka ngai, referee khan kan goal min ham bo sak a ni. Red card erawh yellow card a hmuh tawh avangin a awm lohna ka hre lo a, mah se Ramhlun North player khan a khawih ve tho avangin card chu a hmu ve tur a ni," tiin referee thutlukna a pawm loh lai a sawi lang.

Ngaihnawm

• MPL an khelh hmasak berah Ramhlun North an chak nghal a, Lalruatliana Sailo (Tawia) hote hian Dinthar FC vawi hnih an hnehna chiah a ni.

• Tuna Ramhlun North coach Tawia hian MPL1-ah FC RS Annexe enkawlin match hmasa berah Mizoram Police 2-1 in an hneh tawh bawk.

• Dinthar FC-in MPL-a an champion ṭuma an match hmasa bera FC Kulikawn an hneh hnuah season ṭantirh match hmasa berah an la chak lo vek. MPL1 champion hian FC Kulikawn, Chanmari West, Zo United leh Ramhlun North te hneh loin season bul an ṭan.

• Ramhlun North chakna goal khungtu leh I Day Football best player Zosangliana (Chhaia) hi Dinthar FC-in MPL1 an champion ṭuma player ṭangkai a ni.

• Dinthar FC hi MPL5 ṭan hmaa coach thlak awmchhun an ni a, an thlak chhan erawh coach Lalchhuanawma'n (LCh-a) Germany lam a pan dawn vang a ni. Lalrintluanga'n MPL club a enkawl hmasak berah point a hlawh chhuak zo lo.

• Dinthar FC hi an season fuh loh ber ṭum pawhin pangana aia hnuaiah an la awm ngai lo.

• Dinthar winger Lalruatpuia chu MPL5-a red card hmu hmasa ber a ni.

Tute nge inlan?

Dinthar FC (4-3-3) : Lalrinhlua; Vanneihtluanga, Vanlal­chhan­hima, Lalremtluanga, Lalbiakzuala; R. Lallawmkima (R. Lalnunmawia 58'), R. Lallawmawma (Rameng­mawia 76'), Lalbiaknia Pautu; Lalruatpuia, Michael Lalremruata, Samuel Laltlanthanga (Joseph Lalṭhafela 87')

Ramhlun North FC (4-4-2) : David Lalrinpuia; Israel Laldingngheta, C. Ram­din­mawia, Lalramthlamuana, Lalmuanawma; Jerry F. Zonunsanga, Zosangliana, Lalruatkima Dosel (Lalchhuanpuia 88'), David Lalrinchhana (B. Malsawmzuala 90+1'); Lalchhanchhuaha Fanai (Lalruatfela 82'), Vanlalthlamuana.