Messi a inhliam

Lionel Messi chu a ṭhâl na vangin Nilaini zing dar 4:30-a Argentina leh Venezuela ten 2018 World Cup qualifier an khelh turah a inlan ve thei dawn lo.

Argentina captain hi ram tan inkhelh a chawlh-san tur thu a sawi hnua a lo kir lehna hmasa berah goal khung nghalin Uru-guay lakah 1-0 in hnehna a chan pui a, kar hmasa inkhelah khan Barcelona star hian hliam a tuar a ni.

Argentina coach Edgardo Bauza chuan, "Leo hi a la inkhel thei lo ang, a lakah risk kan la tur a ni lo a, kan enkawl uluk hle tur a ni," tiin a sawi.

South America ram 10 inel zingah Argentina hian match sarih khelh aṭangin point 14 hmuin table-ah hmahruaitu an ni a, an hnuaiah hian point 13 hmu Uruguay, Colombia leh Ecuador te an awm bawk.

Heng ram 10 zinga palite chu Russia World Cup 2018 atana an tling chiang nghal dawn a, pangana chuan Oceania aṭangin - New Zealand, New Caledonia, Fiji, Papua New Guinea, Solomon Islands emaw Tahiti nen playoff an khelh a ṭul dawn a ni.