Player langsar chak zingah Djokovic vannei
US Open 2016 khelh mek-ah mipa singles player langsar leh champion beiseiawm ten hnehna an la chang zel. Novak Djokovic chuan minute 32 chhung lekin third round a paltlang! Inkhel dangah Andy Murray, Rafael Nadal, Stan Wawrinka leh Juan Martin del Potro te pawhin last 16 an in vaw kai ve bawk.
Zirtawpni zan Flushing Meadows, New York-a in-khel-ah world number 1 Djo-kovic leh Mikhail Youzhny an inhmachhawn a, set khatnaah Djokovic hian 4-2 a hma a hruai laiin a khingpui hian a malpui veilamah hliam a tawrh avangin a inkhel chhun-zawm thei lo.
Serbian thiampuipa hi second round-a a khingpui tur Jiri Vesely chu hliam vang thoa a lo inhnuhdawh tawh bawk avangin inkhel hah lutuk loin last 16 a lut thei a, a thahruai a la hman nasat loh avangin a nomawi kawl lai humhim turin beiseina a neih san phah hle ang - match hnih chhung inkhelh hah loh hi Djokovic tan hman ṭangkai tham a tling.
Grand Slam title 13-na tur beisei mektu Djokovic chuan, "Inelna lianah chuan a chawlhkar khatnaah hian a chang chuan thahruai hman hnem a ngai ṭhin hle a, hei hian chawlh kar hnihna a ti harsa ṭhin a, tun ṭumah erawh ka vannei hle. US Open khel tur hian ka inbuatsaih nasa hle a, a bik takin ka hriselna ka ngai pawimawh a, hun rei zawk inkhel tur pawhin ka inpeih hle," tiin a sawi.
Nadal a lo kir
US Open vawi hnih cham-pion tawh Rafael Nadal pawhin third round paltlang turin harsatna tawk lo, a khingpui Andrey Kuznetsov chu darkar hnih tling lo deuhah 6-1, 6-4, 6-2 in a sawp a - kum thum chhunga a vawi khat nan US Open last 16 a lut leh ta.
Spanish Nadal hi hliam a neih fo vang leh round hmasa lama a chak loh fo avangin Grand Slam inelnaah nikuma French Open quarterfinal a khelh hnua third round a paltlang lehna hmasa ber a ni hial.
Kum 30-a upa Nadal chuan, "Ka khel ṭha tluang hle a, Kuznetsov lakah khan a bik takin set hmasa berah khan duhthusama ṭhain ka khel. Ka service ka hloh loh bakah ka inveng ṭha bawk," a ti. Grand Slam vawi 14 champion tawh Nadal hian kumin US Open match thum a khelh tawhah set a la hloh miah lo a ni.
Murray a tluang
World number 2 Andy Murray chuan kum 34-a upa Paolo Lorenzi chu darkar thum leh minute 17 chhungin 7-6 (7-4), 5-7, 6-2, 6-3 in a hneh a, kumin June thla hnuah match 26 a khelh tawh aṭangin vawi 25 zet hnehna a chang thei.
Kumin May thlaa khelh zawh tak Madrid Master-a final a khelh aṭang khan Murray hian ATP hnuaia inel-na a hmachhawn pasarihah final a lut vek a, tunah hian Grand Slam inelna bikah a zawnin last 16 ṭum 23 zet a lut ta bawk.
Rio Olympic champion Murray chuan, "Ball kan vaw rei deuh a nih pawhin ka hmanhmawh phah lo a, kha vang khan unforced errors pawh ka neih tlem phah hle. Point khat hlut zia ka hriat chian tawh em avangin inkhelh chhung zawngin ka inthlahdah ngai lo," tiin a sawi.
Stan a vannei
Grand Slam vawi hnih champion tawh Stan Wawrinka chuan a khingpui world number 64 Dan Evans-a'n set lina tie-break an khelh laia match point a hmuh tawh chu pawttla lehin 4-6, 6-3, 6-7 (6-8), 7-6 (10-8), 6-2 in hnehna a chang.
Kum 31-a upa Wawrinka chuan, "Evans khan match point a hmuh bakah a service a ni bawk a, khati chunga ka inchhanhim thei kha chu ka vannei takzet a ni. Ka khingpui khan theihna sang tak a nei a, kan inkhelh chhung zawng khan min nawr reng a, inkhel hautak leh harsa tak a ni," tiin a sawi.
Del Potro thahrui
Juan Martin del Potro hi ATP ranking-ah 100-na hnuai lam a nih vangin wildcard pek hial ngai mah se inelna tak tak erawh thahrui a ngah zia a pholang chhunzawm zel. Argentina tlangval hian seeded 11-na David Ferrer chu 7-6 (7-3), 6-2, 6-3 in a hneh. 2009 champion Del Potro hian last 16-ah chuan seeded pariatna Dominic Thiem a hmachhawn leh ang.
Kum 27-a upa Del Potro chuan, "Ka champion ṭum-a ka forehand ṭha ang kha ka nei let leh thei a nih chuan mipui hmuhnawm tih khawpa khelh chhuah leh theih ka inbeisei. Ka tan chuan hnehna ka chang emaw, ka chak lo emaw tih ai mahin harsatna hrang hrang kara tennis ka khel leh thei hi a lawmawmin a pawimawh chu a ni," tiin a sawi.
Inkhel dangah seeded parukna Kei Nishikori chuan Nicolas Mahut chu 4-6, 6-1, 6-2, 6-2 in a hneh ve bawk. Japan tlangval hian seeded 21-na Ivo Karlovic a hmachhawn leh thung dawn a ni.