Hma lam panin Kerber a kal zel

World number 1 nih inbeisei mek Angelique Kerber chuan US Open 2016 khelh mekah khawtual tleirawl CiCi Bellis chu 6-1, 6-1 a hnehin third round a paltlang.

Flushing Meadows-a inkhel-ah Australian Open champion Kerber hian tun inelnaa naupang ber dawttu kum 17-a upa Bellis hneh tur hian minute 55 chiah a mamawh a ni. Kum 28-a upa Kerber hian quarterfinal lut tur chuan seeded 22-na Elina Svitolina hnehtu Petra Kvitova a hmachhawn leh ang.

German nula Kerber chuan, "Vawiin hian CiCi ka lawmpui a, amahah khan huaisenna leh theihna sang tak a awm avangin tennis khawvelah hmabak êng tak a nei," a ti. California tleirawl hian Arthur Ashe Stadium-a inkhelh chu a tan a ropui thu a sawi ve bawk.

Inkhel dang

US Open khelh meka upa ber, kum 36-a upa Venus Williams chuan third round-ah seeded 26-na Laura Siegemund chu 6-1, 6-2 in a hneh. Kum 2000 leh 2001 US Open champion Venus hian quarterfinal lut tur chuan Anastasia Pavlyuchenkova hnehtu Karolina Pliskova a paltlang leh a ngai ang. Venus hian hnehna a chang chho zel a nih chuan semifinal-ah a unaunu Serena Williams nen an inhmachhawn thei dawn a ni.

Seeded pangana Simona Halep-i'n a khingpui Timea Babos lakah set khatna awlsam takin la mah se set hnihna a hloh a, set hnuhnung berah 3-1 in a hniam zawk. Romanian star hi a dinhmun chhe zawka a ṭan hnuah insiam ṭha chhoin 6-1, 2-6, 6-4 in hnehna a chang.

Inkhel dangah seeded 11-na Carla Suarez Navarro chuan a kum 28 tlin lawm nan 6-4, 6-3 in Russian star Elena Vesnina a hneh a, seeded palina Agnieszka Radwanska pawhin France nula Caroline Garcia chu 6-2, 6-3 in a hneh ve bawk.