Bale-a that vanglai tak a ni - Coleman
Euro 2016-a beisei aia che- ṭha Wales-in zanin hian 2018 FIFA World Cup qualifier an khel ṭan dawn a, an khingpui tur chu Moldova a ni. Wales coach Chris Coleman chuan an player pawimawh Gareth Bale a fak a, zanin vek hian Spain leh Italy ten coach thar hnuaiah World Cup qualifier an khel ṭan ve bawk ang.
Wales-in Euro 2016 an khelh theih nan Gareth Bale-a'n qualifier-ah goal sarih a khung a, inelna ṭan hnuah group match zawng zawngah goal a khung leh bawk. Real Madrid forward Bale ṭhat zia a lang tawh a, Wales coach Coleman chuan Euro 2016 aia a ṭhat leh zawk tawh thu a sawi.
Kum 46-a upa Coleman chuan, "Gareth-a'n Real tana a season hmasa berah second 75 chhung lekin goal a khung nghal. A theihna ka hriat chian em avangin khelmual chhunga a thil tih hian min barkhaih ngai lo. Real Madrid pawhin hun rei tak a la khelh theih avangin an hmalam hunah Bale hi an dah pawimawh khawp ang. Theihna sang tak a nei a ni mai lo a, chak duhna thinlung a nei bawk. Tun thlengin hma a sawn zel a, chak theihna thuruk a hriat avang hian Real leh Wales tan season ṭha tak a hmang leh ang," tiin Bale a fak.
Wales hian zanin hian Euro 2016-a an player pawimawh Aaron Ramsey leh Jonathan Williams te inhliam vangin an chhawr thei dawn lo. Group D-ah Wales hi Austria, Serbia, the Republic of Ireland, Moldova leh Georgia te nen an awm ho a, zanin hi point thum hmuhna tura ngaih a ni.
Ventura hnuaiah
Italy-in coach thar Giam-piero Ventura hnuaia an match hmasa berah France hneh lo mah se friendly match a nih avangin buaina tur a la awm lo.
Zanina khualmuala Israel an hmachhawn hunah hian France an hmachhawn ṭuma starting eleven chang lo - Leonardo Bo-nucci, Marco Verratti leh Alessandro Florenzi te chu bul ṭantu zingah an tel beisei a ni. Roma midfielder Daniele De Rossi chu chawn na vangin khel thei lo tura ngaih a ni a, Milan midfielder Riccardo Montolivo chu a thlaktu tura ngaih a ni.
France an hneh loh ṭumin Ventura chuan, "Ni thum chhung lek kan training avangin tun aia ṭha kha ka beisei ngam lo. Kan result-ah erawh lawmna tur a awm lo a, kan khelh dan kan thlir let ang a, kan ṭhat lohna lai kan hre thei ang," tiin insiam-
ṭhat an mamawh thu a sawi a, Israel an hmachhawn hunah khelmual chhungah an lantir nghal a ngai ang.
Lopetegui hun
Spain-in coach thar Julen Lopetegui hnuaia an match hmasa berah Belgium 2-0 in an hneh a, Red Devils coach thar Roberto Martinez erawh mipuiin an au el thung.
Inhliam vanga striker Alva-ro Morata lakchhuah a ngai tih loh chu Lopetegui hnuaia La Roja match hmasa berah lungawi lohna tur a awm lo. Real Madrid forward Morata hi a dam leh tawh tura ngaih a ni a, chutihrualin Chelsea striker Diego Costa a khelh ṭhat avangin Spain boss thar tan thutlukna siam a har khawp ang.
Spain-in zanin hian Liech-tenstein an hmachhawn dawn a, coach thar Lopetegui hnuaia competitive match hmasa ber tur a ni ang.
Fixtures
Zanin inkhel tur
Georgia 9:30 PM Austria
Serbia 12:15 AM Rep of Ire
Wales 12:15 AM Moldova
Albania 12:15 AM FYR Macedonia
Israel 12:15 AM Italy
Spain 12:15 AM Liechtenstein
Croatia 12:15 AM Turkey
Ukraine 12:15 AM Iceland
Finland 12:15 AM Kosovo
September 6, Thawhlehni Zan
Belarus 12:15 AM France
Bulgaria 12:15 AM Luxembourg
Sweden 12:15 AM Netherlands
Andorra 12:15 AM Latvia
Faroe Islands 12:15 AM Hungary
Switzerland 12:15 AM Portugal
Bosnia-Herzegovina 12:15 AM Estonia
Cyprus 12:15 AM Belgium
Gibraltar 12:15 AM Greece
Group InṬhen Dan
Group A : Netherlands, France, Sweden, Bulgaria, Belarus, Luxembourg.
Group B : Portugal, Switzerland, Hungary, Faroe Islands, Latvia, Andorra.
Group C : Germany, Czech Republic, Northern Ireland, Norway, Azerbaijan, San Marino.
Group D : Wales, Austria, Serbia, Republic of Ireland, Moldova, Georgia.
Group E : Romania, Denmark, Poland, Montenegro, Armenia, Kazakhstan.
Group F : England, Slovakia, Scotland, Slovenia, Lithuania, Malta.
Group G : Spain, Italy, Albania, Israel, Macedonia, Liechtenstein.
Group H : Belgium, Bosnia Herzegovina, Greece, Estonia, Cyprus, Gibraltar.
Group I : Croatia, Iceland, Ukraine, Turkey, Finland, Kosovo.