Goa tan Lucio a khel zel dawn

5th September, 2016

Indian Super League club FC Goa chuan season hmasaa an captain Brazilian defender Lucio chu a season hnih nan contract an ziahpui. Bayer Leverkusen, Bayern Munich, Inter Milan leh Juventus tana lo khel tawh defender hian season hmasa khan ISL match 14 a lo khel tawh a ni.

Champions League leh World Cup nomawi lo chawi tawh defender chuan, "FC Goa tana contract ka ziak leh thei hi ka lawm takzet a, season hmasaah khan tournament duhawm tak kan hman avangin tun season-ah hian champion ngei beiseiin ka lokal a ni," tiin Zico enkawl Goa a zawm nawn chhan a sawi.

Goa hian Lucio bakah Brazilian defensive midfielder Richarlyson an lalut bawk a, kum 33-a upa midfielder hian season hman zawh takah khan Novorizontino tan khelin Brazilian club langsar Sao Paulo leh Atletico Mineiro tan pawha lo khel tawh niin Brazil tan vawi hnih a inlan ve tawh bawk.