LSL2-ah champion lai chak nghal

Lunglei Super League 2 chu Zirtawpni khan Ṭhuamluaia Mualah khelh ṭan a ni leh ta a, match hmasa berah champion lai Zotlang FC chuan kaithar Venglai FC chu HS Lalremtluanga, PC Lalrinzuala leh Vanlalhlua te goal hmangin 3-1 in an hneh. Inrinni khan Bazarveng leh Venghlun FC ten an khingpui an hneh ve ve bawk.

LDFA buatsaih LSL2 hi phase 1 leh 2-ah ṭhen niin phase 1 hi kumin October thlaah khelh zawh a ni ang a, phase 2 hi December thla tirah khel zoin a sang 4 ten semifinal khelin final khelh chhunzawm a ni ang.

Team 8 awm tura ruahman ni tawhsa chu rokhawlhna avanga SYS Football Academy an inhnuh-dawh tak avangin team 7 - Zotlang FC, Electric Veng FC, Bazarveng FC, Venghlun FC, Lunglawn FC, Ramthar FC leh Venglai FC an inel dawn ta a ni. Champion team hian Rs. 100,000 dawngin table-a an dinhmun a zirin prize money siam vek a ni bawk.